இங்கு வெளிநோயாளிகள் பிரிவு காலை 7:45 மணிக்கு துவங்கி மதியம் 12:00 வரை டாக்டர்கள் சிகிச்சை அளிப்பர். முன்பு டாக்டர்கள் 7:15 மணிக்கு மருத்துவமனைக்குள் வந்து விடுவார்கள். தற்போது ஒரு சிலரை தவிர பெரும்பாலானோர் காலை 8:30 மணி முதல் 9:30 மணிக்கு தான் வருகின்றனர்.

இதனால் புறநோயாளிகள் பிரிவில் நோயாளிகள் சிகிச்சை பெற வரிசையில் நீண்ட நேரம் நின்று சிரமப்படுகின்றனர். பின் டாக்டர் வந்தவுடன் தள்ளு, முள்ளு செய்து சந்திக்கும் நிலை உள்ளது.

இரவில் டாக்டர்கள் இல்லை இரவில் பிரசவம்,அவசர சிகிச்சை பிரிவுக்கு இரு டாக்டர்கள் மட்டுமே உள்ளனர். இது போதுமானதாக இல்லை. குறைந்தது 5 டாக்டர்கள் பணியில் இருக்க வேண்டும். இரவு 7:00 மணிக்கு மேல் அவசர சிகிச்சை பெற வருபவர்கள், தேனி மருத்துவக் கல்லூரிக்கு அனுப்பி வைக்கப்படுகின்றனர். இரு தினங்களுக்கு முன் தெய்வேந்திரபுரத்தைச் சேர்ந்த சரவணக்குமார் மகன் சர்வேஷ் 7, வயிற்றுவலிக்கு அதிகாலை 12:00 மணிக்கு கொண்டு வரப்பட்டார். முதலுதவி செய்து தேனி மருத்துவக் கல்லூரிக்கு அனுப்பி வைக்கப்பட்டார். அங்கு அதிகாலை 4:00 மணிக்கு இறந்தார். எனவே இரவில் கூடுதலாக டாக்டர்கள் இருக்க நடவடிக்கை வேண்டும்.

பயிற்சி டாக்டர்களும் வரலை தேனி மருத்துவக் கல்லூரி மருத்துவமனையில் இருந்து முன்பு எம்.பி.பி.எஸ்., மற்றும் முதுகலை டாக்டர்கள் 10 பேர் மதியம் 2:00 மணி முதல் மறுநாள் காலை 7:00 மணி வரை சிகிச்சை அளித்து வந்தனர். இது மக்களுக்கு பயனுள்ளதாக இருந்தது. தற்போது பயிற்சி டாக்டர்கள் வருவதில்லை. இதனால் நோயாளிகள் சிரமம் அடைகின்றனர்.

லேப்டெக்னீசியன் பற்றாக்குறை: மருத்துவமனையில் தினமும் 600 க்கும் மேற்பட்டோர் ரத்தமாதிரிகள் எடுக்க வேண்டியுள்ளது. இதற்கு 8 லேப்டெக்னீசியன் தேவை. ஆனால் 3 பேர் மட்டுமே உள்ளனர். இவர்கள் ரத்தமாதிரிகளை சோதனை செய்து ரிப்போர்ட் தயார் செய்ய வேண்டும். இதனால் ரத்தமாதிரிகள் சோதனை செய்து முடிவு அறிவிப்பதில் சிரமம் உள்ளது. மருத்துவமனை மற்றும் வார்டுகளில் மருத்துவ இணை இயக்குனர், கண்காணிப்பாளர், நிலைய அலுவலர் வார்டுகளுக்கு ரவுண்ட்ஸ் சென்று நோயாளிகள் குறைகளை கேட்டு சிகிச்சை அளிக்க வேண்டும் என சமூக ஆர்வலர்கள் வலியுறுத்தி உள்ளனர்.