போடிமேலச்சொக்கநாதபுரம், ஆலமரத்துபட்டியில் 10.72 ஏக்கர் நிலத்தின் ஒரு பகுதியில் ஜக்கம்மாள் கோயில் உள்ளது. கோயில் ஹிந்து சமய அறநிலையத்துறைக்கு உட்பட்டது. இக்கோயில் பூஜை, திருவிழா நடத்த 10.72 ஏக்கர் நிலத்தை கரட்டுப்பட்டியை சேர்ந்த பூஜாரி அப்பிநாயக்கர் மகன் எட்டமநாயக்கர் பெயரில் மைனர் இனாம் ஒழிப்பு செட்டில்மென்ட் மதுரை தாசில்தார் மூலம் 55 ஆண்டுகளுக்கு முன்பு பட்டா வழங்கப்பட்டு உள்ளது.

பட்டா பெற்ற வாரிசுதாரர் கோயிலுக்கு பூஜை, அபிஷேகம், காவல் பணியில் ஈடுபடும் வரை அந்த நிலத்தை அனுபவித்துக் கொள்ளலாம். உரிமை, சொந்தம் கொண்டாட முடியாது. இந்த நிலத்தை வேறு நபர்களுக்கு கிரயம், ஈடு, அடமானம், ஒத்திக்கு ஹிந்து சமய அறநிலையத்துறை கமிஷனரின் அனுமதி இன்றி செய்யக்கூடாது. அவ்வாறு செய்தால் அது செல்லத்தக்கது அல்ல. பூஜாரி பூஜை பணிகளில் ஈடுபடாத போது நிலத்தை அறநிலையத்துறை கையகப்படுத்திக்கொள்ளலாம் என விதியில் குறிப்பிடப்பட்டுள்ளது.

இந்நிலையில் நிபந்தனை களை மீறி 10.72 ஏக்கர் நிலத்தை 35 ஆண்டுகளுக்கு முன்பு பூஜாரி எட்டம நாயக்கர் தனி நபர்களுக்கு விற்பனை செய்துள்ளார். 50க்கும் மேற்பட்ட உட்பிரிவு செய்து தனி நபர் பெயரில் பட்டா வழங்கப்பட்டு உள்ளது. இந்த இடங்களில் 100 க்கு மேற்பட்ட நபர்கள் தற்போது வீடுகள் கட்டி வசித்து வருகின்றனர்.

ஆர்.டி.ஓ.,விடம் அறநிலையத்துறை மனு இதனை ரத்து செய்து மீண்டும் கோயில் பெயரில் பட்டா பதிவு செய்ய கோரி ஆர்.டி.ஓ.., விடம் ஹிந்து சமய அறநிலையத்துறை சார்பில் மனு தாக்கல் செய்து விசாரணை நிலுவையில் உள்ளது. இதனை ஒட்டி கோயில் நிலங்கள் தொடர்பாக கிரையம், ஈடு. அடமானம், ஒத்தி, தானசெட்டில்மென்ட், தனி நபர்கள் பெயரில் பட்டா மாறுதல் செய்திட கூடாது என தேனி அறநிலையத் துறை தாசில்தார் சண்முகவேலு (கோயில் சொத்துக்களை முறைப் படுத்துதல்) உத்தரவு பிறப்பித்து உள்ளார்.

இதனை ஒட்டி இந்த நிலத்திற்கு உட்பட்ட இடங்களுக்கு வருவாய்த்துறை சார்பில் பட்டா, சார்பதிவாளர் அலுவலகத்தில் பத்திரப்பதிவு செய்வதும் நிறுத்தி வைக்கப்பட்டு உள்ளன.

அந்த இடத்தில் ரூ.பல லட்சம் மதிப்பில் வீடு, இடங்களை வாங்கிய பொதுமக்கள் தற்போது என்ன செய்வது என்று தெரியாமல் தவிக்கின்றனர்.