பொதுமக்களின் குறைகள், புகார்களை நிவர்த்தி செய்ய ஜூலை 15 முதல் தமிழக அரசு உங்களுடன் ஸ்டாலின் திட்ட முகாம்கள் நடத்தப்பட்டன. ஊராட்சி, ஒன்றியம், பேரூராட்சி, நகராட்சி என தனித்தனியாக பிரித்து முகாம்கள் நடத்தப்பட்டன. தேனி மாவட்டத்தில் இரு கட்டங்களாக ஜூலை 15 முதல் அக்., 10 வரை 218 முகாம்கள் நடத்தப்பட்டன.

இம் முகாமில் பொதுமக்கள் மனு எழுதி வழங்கும் சிரமத்தை போக்க அரசு சார்பில் அச்சடிக்கபட்ட மனுக்கள் வழங்கப்பட்டன.

அதனை பூர்த்தி செய்ய உதவும் வகையில் தன்னார்வலர்கள் நியமிக்கப்பட்டு மனுக்கள் வழங்கப்பட்டது. என்னென்ன சேவைகள் எந்த துறைகளால் வழங்கப்படுகிறது என பொதுமக்கள் தெரிந்து கொள்ள நோட்டீஸ் அடிக்கப்பட்டு வழங்கப் பட்டன.

முகாம்களில் பட்டா மாறுதல், மின்வாரியம், முதியோர் உதவித்தொகை, இலவச வீடு, வேலைவாய்ப்பு உள்ளிட்ட பல்வேறு கோரிக்கைகளை வலியுறுத்தி சுமார் 56 ஆயிரம் மனுக்களை பொதுமக்கள் வழங்கினர். இது தவிர சுமார் 53ஆயிரத்திற்கும் மேற்பட்டோர் மகளிர் உரிமைத்தொகை கோரி விண்ணப்பித்தனர்.

மாவட்டத்தில் இம் முகாம்கள் முடிந்து 40 நாட்களுக்கு மேல் ஆகிறது. ஆனால் முகாமிற்காக அச்சடிக்கப்பட்ட நோட்டீஸ்கள், மனுக்கள் ஏராளமான மிஞ்சின.

இவற்றை வேறு பயன்பாட்டிற்கும் பயன்படுத்த முடியாது.

எஞ்சிய நோட்டீஸ்களை கலெக்டர் அலுவலகத்தில் சமூக பாதுகாப்பு திட்ட அலுவலகம் முன் அதிகாரிகள் அடுக்கி வைத்துள்ளனர். தேவையான அளவை விட கூடுதலாக அச்சடிக்கப்பட்டதால் நோட்டீஸ்கள் வீணாகி உள்ளன.