திருவள்ளூர் மாவட்டம், திருத்தணி ஒன்றியம் சத்திரஞ்ஜெயபுரம் கிராமத்தை சேர்ந்த சக்திவேல், 30, இவர் 2018 முதல், இந்திய ராணுவத்தில் பணிபுரிந்து வந்தார்.

பயங்கரவாதிகள் கடந்த 4ம் தேதி காலை ஜம்பு- காஷ்மீர் எல்லை பகுதியில் பாதுகாப்பு பணியில் இருந்த போது, பயங்கரவாதிகள் தாக்குதலில் குண்டடிப்பட்டு உயிரிழந்தார்.

அவரது உடல் நேற்று முன்தினம் இரவு தனிவிமானம் மூலம் புதுடில்லிக்கு கொண்டு வரப்பட்டது. அங்கு ராணுவ மரியாதை செய்த பின் நேற்று காலை, 6:00 மணிக் கு சென்னை விமான நிலையத்திற்கு வந்தது. அங்கிருந்து அரசு ஆம்புலன்ஸ் மூலம் காலை 9:30 மணிக்கு திருத்தணி அடுத்த சத்திரஞ்ஜெயபுரம் கிராமத்திற்கு கொண்டு வரப்பட்டது.

மதியம் 12:00 மணியளவில் ராணுவ அதிகாரிகள் வந்து, சக்திவேல் உடல் மீது தேசிய கொடி போர்த்தி இறுதி அஞ்சலி செலுத்திய பின், சக்திவேல் பெற்றோர், மனைவியிடம் ஒப்படைத்தனர்.

அஞ்சலி பின் திருவள்ளூர் கலெக்டர் பிரதாப், எஸ்.பி., விவேகானந்த சுக்லா, அரக்கோணம் தி.மு.க.,- எம்.பி., ஜெகத்ரட்சகன், திருத்தணி தி.மு.க.,- எம்.எல்.ஏ., சந்திரன், திருத்தணி நகராட்சி தலைவர் சரஸ்வதி பூபதி, அரக்கோணம் முன்னாள் எம்.பி., அரி உட்பட பல்வேறு அரசியல் கட்சி நிர்வாகிகள் சக்திவேல் உடலுக்கு மலர் அஞ்சலி செலுத்தினர்.

மாலை 5:00 மணிக்கு சத்திரஞ்ஜெயபுரம் சுடுகாட்டில் திருத்தணி டி.எஸ்.பி., கந்தன் தலைமையில் போலீசார், 21 குண்டுகள் முழங்க மரியாதை செலுத்தினர். பின், ராணுவ வீரர் சக்தி வேல் உடல் அடக்கம் செய்யப்பட்டது.