கும்மிடிப்பூண்டி அடுத்த ஆரம்பாக்கம், சின்னநத்தம் கிராமத்தைச் சேர்ந்தவர் தயாளன் மனைவி தனம், 42; பூ வியாபாரி. இவர், நேற்று முன்தினம் கல்லால் அடித்து கொலை செய்யப்பட்டார். ஆரம்பாக்கம் போலீசார் வழக்கு பதிந்து விசாரித்து வந்தனர்.

முதற்கட்ட விசாரணை யில், அவரது காதில் இருந்த தங்க கம்மல்கள் திருடப்பட்டிருந்ததால் பணம், நகைக்காக கொலை செய்யப்பட்டிருப்பது தெரிந்தது. தொடர்ந்து, அதே பகுதியைச் சேர்ந்த தினேஷ், 26, என்பவர், தனத்தை பின்தொடர்ந்து சென்றது தெரிய வந்தது.

இதையடுத்து போலீசார், நேற்று தினேஷை பிடித்து விசாரித்தனர்.

போலீசார் விசாரணையில் தெரியவந்ததாவது:

நேற்று முன்தினம் பூ வியாபாரம் முடித்துவிட்டு, தனம் வீடு திரும்பிக் கொண்டிருந்தார். அப்போது, தினேஷ் பின்தொடர்ந்து வந்து, தனத்திடம் மொபைல்போன் கேட்டுள்ளார். தெரிந்தவர் என்பதால், தனம் மொபைல்போனை கொடுத்துள்ளார். பின், குடிக்க பணம் கேட்டு தொந்தரவு செய்துள்ளார்.

தனம் பணம் தரமறுத்த நிலையில், தினேஷ், கல்லால் தாக்கி கொலை செய்துள்ளார். பின், தனத்தின் காதில் இருந்த 2 கிராம் தங்க கம்மலை எடுத்துக் கொண்டு தப்பினார்.

இவ்வாறு விசாரணையில் தெரியவந்தது.

இதை தொடர்ந்து, ஆரம்பாக்கம் போலீசார் தினேஷை கைது செய்தனர்.