திருவாலங்காடு காவல் எல்லைக்குட்பட்டு, 40க்கும் மேற்பட்ட கிராமங்கள் உள்ளன. இதில், சின்னம்மாபேட்டை, மணவூர், அரிசந்திராபுரம், வீரராகவபுரம், திருவாலங்காடு உள்ளிட்ட கிராமங்களும் அடங்கும்.

இப்பகுதிகளில், சமீபநாட்களாக போதை வாலிபர்கள் அட்டகாசம் செய்து வருகின்றனர்.

திருவாலங்காடு ரயில் நிலையம் அருகே, ஐந்துக்கும் மேற்பட்ட வாலிபர்கள், கஞ்சா போதையில் சரமாரியாக தாக்கிக் கொண்டனர்.

இச்சாலை வழியாக, பணி முடிந்து இரவு வீட்டிற்கு வருவோர் அச்சத்தில் உள்ளனர்.

சமீபத்தில், வீரராகவபுரம் கிராமம் வழியாக பணி முடித்து வீடு திரும்பிய மத்திய அரசு ஊழியரிடம், மூன்று பேர் கொண்ட போதை கும்பல் பணம் கேட்டு சரமாரியாக தாக்கியது.

அதேபோல், திருவாலங்காடில் போதை ஆசாமி ஒருவர், சாலையில் செல்வோரை உருட்டுகட்டையால் தாக்கிய சம்பவமும் நடந்தது. இதை, திருவாலங்காடு காவல் துறையினர் கண்டுகொள்வதே இல்லை என, பெண்கள் புலம்புகின்றனர்.

இதுகுறித்து, திருவாலங்காடைச் சேர்ந்த சந்தியா, 34, கூறியதாவது:

திருவாலங்காடு பகுதியில் கஞ்சா புழக்கம் அதிகரித்துள்ளது. காவல் நிலையம் அருகிலேயே கஞ்சா, மது உள்ளிட்ட போதை பொருட்கள் விற்பனை செய்யப்படுகிறது. தேரடி சாலையில் போதை நபர், அவ்வழியாக செல்வோரை தாக்கினார். ஆனால், போலீசார் எவ்வித நடவடிக்கையும் எடுக்கவில்லை.

மணவூர், தொழுதாவூர், சின்னம்மாபேட்டையில் கஞ்சா பயன்படுத்தும் வாலிபர்களின் எண்ணிக்கை நாளுக்கு நாள் அதிகரித்து வருகிறது. மேலும், கஞ்சா போதையில் இருக்கும் வாலிபர்கள், அவ்வழியாக செல்லும் பெண்களிடம் சில்மிஷத்தில் ஈடுபட்டு வருகின்றனர்.

இதுகுறித்து, காவல் துறையினரிடம் தெரிவித்தால், காவலர் பற்றாக்குறை என தெரிவிக்கின்றனர். இதனால், பெண்களின் பாதுகாப்பு கேள்விக்குறியாகி உள்ளது. இதன் காரணமாக, பெண்கள் மற்றும் குழந்தைகள் தெருவில் நடமாடவே அச்சப்படுகின்றனர்.

எனவே, காவல் துறை உயரதிகாரிகள் ஆய்வு செய்து, கஞ்சா புழக்கத்தை கட்டுப்படுத்த வேண்டும். மேலும், போதை வாலிபர்கள் மீது கடும் நடவடிக்கை எடுக்க வேண்டும்.

இவ்வாறு அவர் கூறினார்.