திருவள்ளூர் கலெக்டர் அலுவலக கூட்டரங்கில் நேற்று, விவசாயிகள் நலன் காக்கும் கூட்டம், கலெக்டர் பிரதாப் தலைமையில் நடந்தது.

கூட்டத்தில், கும்மிடிப்பூண்டியைச் சேர்ந்த விவசாயிகள் கூறியதாவது:

தாமரை ஏரியில், நான்கு ஆண்டுகளுக்கும் மேலாக தொழிற்சாலைகள் மற்றும் குடியிருப்பு பகுதிகளில் இருந்து வெளியேறும் கழிவுநீர் கலக்கிறது.

குறிப்பாக, தொழிற்சாலை கழிவுநீரால், குளத்து நீரின் தன்மை பாதிக்கப்பட்டு கருமையாக மாறியுள்ளது. உலோக பொருட்கள் அனைத்தும், கருமை நிறமாக மாறிவிடுகிறது.

மேலும், அங்கிருந்து வெளியேறும் தண்ணீர் மற்றும் அருகில் உள்ள ஈசா மற்றும் பெரிய ஏரிகளில் இருந்து வெளியேறும் நீர் சங்கமிக்கும் இடத்திலும், நீரின் நிறம் கருப்பாக மாறியுள்ளது. இதனால், குளத்தைச் சுற்றிலும் உள்ள பகுதிகளில் நிலத்தடி நீர் மாசடைந்து, பயன்படுத்த தகுதியில்லாமல் உள்ளது.

இவ்வாறு அவர்கள் கூறினர்.

இதைத் தொடர்ந்து, கலெக்டர் பிரதாப், 'தாமரை ஏரியில் கழிவுநீர் கலக்கக் கூடாது என, ஏற்கனவே அறிவுறுத்தி உள்ளோம். மேலும், ஏரியை பாதுகாக்கவும், துார்வாரி சீரமைக்கவும், 32 கோடி ரூபாயில் பணிகள் விரைவில் துவங்க உள்ளது. அப்பணி நிறைவடைந்ததும், தாமரை ஏரி சுத்தமாக மாறும்' என்றார்.