246 மீட்டர் நீளம் சென்னையில் இரண்டாம் கட்ட மெட்ரோ ரயில் திட்டப்பணி, மூன்று வழித்தடங்களில் மேற்கொள்ளப்பட்டு வருகிறது.

இதில் ஒன்றான மாதவரம் - சோழிங்கநல்லுார் மெட்ரோ ரயில் தடத்தில், ஐந்து சுரங்கப்பாதை மெட்ரோ ரயில் நிலையங்கள், 39 மேம்பால நிலையங்கள் அமைக்கும் பணிகள் முழு வீச்சில் நடந்து வருகின்றன.

இந்த தடத்தில், கொளத்துாரில் இரு பாதைகள் அமைப்பதற்காக சுரங்கம் தோண்டும் பணியில் குறிஞ்சி, முல்லை என இரு ராட்சத இயந்திரங்கள் ஈடுபடுத்தப்பட்டன.

இதில், கொளத்துார் சாய்வுதளத்தில் இருந்து கொளத்துார் நிலையம் வரை ஒரு பாதை அமைக்க, 247 மீட்டர் நீளத்திற்கு குறிஞ்சி இயந்திரம் சுரங்கம் தோண்டியது. இப்பணி பிப்., 18ல் துவங்கி, ஆகஸ்ட் மாதத்தில் நிறைவடைந்தது.

அதே வழித்தடத்தில் இரண்டாவது பாதை அமைக்க, முல்லை இயந்திரம், சுரங்கம் தோண்டுவதற்கான பணியை மே 23ல் துவங்கியது. 246 மீட்டர் நீளத்தை வெற்றிகரமாக கடந்த இந்த இயந்திரம், கொளத்துார் நிலையத்தை நேற்று வந்தடைந்தது.

புதிதாக சுரங்கம் இந்த நி கழ்வின்போது, சென்னை மெட்ரோ ரயில் நிறுவனத்தின் திட்ட இயக்குநர் அர்ச்சுனன், தலைமை பொது மேலாளர் லிவிங்ஸ்டோன் எலியாசர் உள்ளிட்ட பலர் இருந்தனர்.

சென்னை மெட்ரோ ரயில் நிறுவன அதிகாரிகள் கூறியதாவது:

கொளத்துாரில் செங்குத்தான சாய்வு மற்றும் அதிக போக்குவரத்துக்கு உட்பட உள்வட்டச் சாலையின் நடுவில், அனைத்து சவால்களையும் கடந்து, எந்தவித இடையூறும் இல்லாமல், முல்லை இயந்திரம் அதன் பணியை நிறைவு செய்துள்ளது.

அடுத்ததாக குறிஞ்சி சுரங்கம் தோண்டும் இயந்திரம், கொளத்துார் நிலையம் முதல் ஸ்ரீனிவாசா நகர் வரை 1,060 மீட்டர் நீளத்திற்கு சுரங்கம் அமைக்கும் பணியை துவங்கி உள்ளது. இப்பகுதியில் கடினமான பாறைகள் மற்றும் 230 மீட்டர் நீளத்துக்கு கூர்மையான வளைவுகள் உள்ளன.

அவற்றை கடந்து வெற்றிகரமாக சுரங்கம் அமைக்கப்படும்.

இவ்வாறு அவர்கள் கூறினர்.