திருவள்ளூர் ஜே.என்.சாலையில் இருந்து காக்களூர் ஏரியை ஒட்டி, ஆவடிக்கு செல்லும் பைபாஸ் சாலை அமைந்துள்ளது. இச்சாலையின் இருபுறமும், தமிழ்நாடு வீட்டு வசதி வாரிய குடியிருப்பு பகுதி மற்றும் கடைகள் அமைந்துள்ளன.

இந்நிலையில், ஏரியை ஒட்டி கோவில், ரேஷன் கடை அமைந்துள்ள பகுதியில், தற்போது சில கடைகள் ஆக்கிரமித்து வருகின்றன. இதனால், வாகனம் செல்ல இடையூறு ஏற்படுகிறது.

மேலும், கோவிலுக்கு அருகில் உள்ள ரேஷன் கடைக்கு செல்லும் வழியை மறித்து வைக்கப்பட்ட ஆக்கிரமிப்பு கடைகளால், அப்பகுதி மக்கள் சென்றுவர சிரமப்படுகின்றனர். மேலும், மழைநீர் வெளியேற வழியின்றி அங்கேயே தேங்கி, சாக்கடையாக மாறி துர்நாற்றம் வீசுகிறது.

கழிவுநீரை தாண்டி செல்ல முடியாமல் மக்கள் தவித்து வருகின்றனர்.

எனவே, நெடுஞ்சாலை துறையினர், ஜே.என்.சாலை - ஆவடி பைபாஸ் சாலை சந்திப்பில் இருந்து காக்களூர் ஏரிக்கரை வரை, ஆக்கிரமிப்பு கடைகளை அகற்ற நடவடிக்கை எடுக்க வேண்டும் என, அப்பகுதி மக்கள் வேண்டுகோள் விடுத்துள்ளனர்.