திருமிழசை: சென்னை - பெங்களூரு தேசிய நெடுஞ் சாலையில், திருமழிசை சிப்காட் - ஸ்ரீபெரும்புதுார் டோல்கேட் வரை 12 கி.மீ.,க்கு அகற்றப்பட்ட 18 நிழற்குடைகள் மீண்டும் அமைக்கப்படாததால், பேருந்துக்காக காத்திருக்கும் பயணியர் மற்றும் மாணவ - மாணவியர், பக்கவாட்டு தடுப்பு பகுதியில் ஆபத்தான முறையில் பேருந்துக்காக காத்திருக்கின்றனர்.

சென்னை -- பெங்களூரு தேசிய நெடுஞ்சாலை, 2014-ம் ஆண்டு ஆறு வழிச்சாலையாக விரிவுபடுத்தும் திட்டம் அறிவிக்கப்பட்டு, 2018ம் ஆண்டின் இறுதியில் பணிகள் துவங்கப்பட்டது.

இதில், மாநில நெடுஞ்சாலை துறையால், 2022ம் ஆண்டு துவக்கப்பட்ட மதுரவாயல் - ஸ்ரீபெரும்புதுார் வரையிலான 25 கி.மீ., சாலை விரிவாக்க பணிகள் இறுதிகட்டத்தை எட்டியுள்ளது.

இதில், திருமழிசை சிப்காட் பகுதியிலிருந்து ஸ்ரீபெரும்புதுார் டோல்கேட் வரை, 12 கி.மீ.,க்கான ஆறு வழிச்சாலை பணிகள், 2023 ஆகஸ்ட் மாதம் நிறைவடைந்தது. பணிகள் நிறைவடைந்து இரு ஆண்டுகளாகியும், நெடுஞ்சாலையின் இருபுறமும் உள்ள 18 பயணியர் நிழற்குடைகள் அகற்றப்பட்டன.

ஆனால், தற்போது வரை மீண்டும் பயணியர் நிழற்குடை அமைக்கப்படவில்லை. தற்போது, பாப்பான்சத்திரம் பகுதியில் உள்ள சாலையின் ஒருபுறம் மட்டும், எம்.எல்.ஏ., தொகுதி மேம்பாட்டு நிதியின் கீழ், 7 லட்சம் ரூபாய் மதிப்பில் நிழற்குடை அமைக்கப்பட்டுள்ளது.

பிற இடங்களில் நிழற்குடைகள் இல்லாததால், பேருந்துக்காக காத்திருக்கும் செம்பரம்பாக்கம், பாப்பான்சத்திரம், செட்டிபேடு, தண்டலம், இருங்காட்டுக்கோட்டை உட்பட 15க்கும் மேற்பட்ட கிராமங்களைச் சேர்ந்த பயணியர் மற்றும் மாணவ - மாணவியர் வெயில், மழையில் கடும் சிரமப்பட்டு வருகின்றனர்.

மேலும், நிழற்குடை இல்லாததால் நெடுஞ்சாலையோரம் உள்ள பக்கவாட்டு தடுப்பு துாண் பகுதியில் ஆபத்தான நிலையில் பேருந்துக்காக காத்திருக்கின்றனர்.

எனவே, திருமழிசை - ஸ்ரீபெரும்புதுார் டோல்கேட் வரை உள்ள தேசிய நெடுஞ்சாலையோரம் பயணியர் நிழற்குடை அமைக்க வேண்டுமென, 15க்கும் மேற்பட்ட கிராம மக்கள் மற்றும் மாணவ - மாணவியர் கோரிக்கை விடுத்துள்ளனர்.

இதுகுறித்து, தேசிய நெடுஞ்சாலைத்துறை ஆணைய அதிகாரி கூறியதாவது:

தேசிய அதிவிரைவு நெடுஞ்சாலை சீரமைப்பு பணிகளை மட்டும் தான் கவனித்து வருகிறோம். சாலையோர நிழற்குடை கள் அமைப்பது குறித்து, சம்பந்தப்பட்ட ஊராட்சிகள் தான் மேற்கொள்ள வேண்டும்.

மேலும் இணைப்பு சாலையில் ஏற்படும் போக்குவரத்து நெரிசலை சம்பந்தப்பட்ட காவல் துறையினர் தான் மேற்கொள்ள வேண்டும்.

இவ்வாறு அவர் கூறினார்.

இதுகுறித்து, ஊரக வளர்ச்சித் துறை அதிகாரி கூறியதாவது:

பாப்பர ம்பாக்கம் பகுதியில் சாலையின் ஒருபுறமும் மட்டும் நிழற்குடை அமைக்கப்பட்டுள்ளது. மற்றொரு பகுதியில் ஆய்வு செய்து, நிழற்குடை அமைக்க நடவடிக்கை எடுக்கப்படும். அதேபோல், பிற பகுதி களிலும் சம்பந்தப்பட்ட ஒன்றிய அதிகாரிகள் மூலம் பயணியர் நிழற்குடை அமைக்க நடவடிக்கை எடுக்கப்படும்.

இவ்வாறு அவர் கூறினார்.