திருப்பூர் அருகே, சின்னக்காளிபாளையம் கிராமத்தில் உள்ள, 7 ஏக்கர் நிலத்தில், குப்பைகளை தரம் பிரிப்பதற்கான கிடங்கு அமைக்கும் பணியை மாநகராட்சி மேற்கொண்டுள்ளது.

இப்பகுதி மக்கள் கடும் எதிர்ப்பு தெரிவித்து தொடர் போராட்டத்தில் ஈடுபட்டு வருகின்றனர். நேற்று, நான்காவது நாளாக பொதுமக்கள் காத்திருப்பு போராட்டத்தில் ஈடுபட்டனர். முன்னதாக, இதுதொடர்பான வழக்கு விசாரணை சென்னை ஐகோர்ட்டில் நடந்து வருகிறது. நேற்று முன்தினம், கோர்ட் உத்தரவை பின்பற்றி, மாசுக்கட்டுப்பாடு வாரிய அதிகாரிகள், மாநகராட்சி இடத்தில் ஆய்வு செய்தனர்.

போராட்டக் குழுவினர் கூறியதாவது:

குப்பை விவகாரம் தொடர்பான வழக்கு விசாரணை நேற்றும் நடந்தது. சின்னக்காளிபாளையத்தில் உள்ள மாநகராட்சி இடத்தில், நுாறு சதவீத பணிகள் முடிக்கப்பட்டதாகவும், விவசாய நிலங்கள், குடியிருப்புகள், நீர்நிலைகள் உள்ளிட்ட எதுவும் அருகில் இல்லை எனவும், தவறான தகவல்கள் அளிக்கப்பட்டுள்ளன.

ஆய்வறிக்கை மற்றும் வழக்கறிஞரின் வாதத்தின் அடிப்படையில், தவறான தகவல்கள் வழங்கியதாக கூறி, கோர்ட், மாநகராட்சியை கண்டித்தது. மேலும், இதுதொடர்பாக கூடுதல் விசாரணை மேற்கொள்வதற்காக, டிச., 1 அன்று விசாரணையை மீண்டும் ஒத்திவைத்தது. மாசுக்கட்டுப்பாடு வாரிய அதிகாரிகள் அளித்த ஆய்வறிக்கை பொதுமக்கள் தரப்பிலான வாதங்களுக்கு உறுதி சேர்த்ததாக அமைந்தன. கோர்ட் விசாரணை மிகுந்த நம்பிக்கையை ஏற்படுத்தி உள்ளது. கோர்ட் விசாரணை ஒத்திவைக்கப்பட்டதால், போராட்டத்தையும் இரண்டு நாட்கள் ஒத்திவைத்துள்ளோம்.

இவ்வாறு, அவர்கள் கூறினர்.

முன்னதாக, பல்லடம் எம்.எல்.ஏ., ஆனந்தன், முன்னாள் எம்.எல்.ஏ.,க்கள் நடராஜன், பரமசிவம் உள்ளிட்ட அ.தி.மு.க., நிர்வாகிகள் பலர், நேற்று, போராட்டத்தில் ஈடுபட்ட பொதுமக்களை சந்தித்தனர். நேற்று வரை போராட்டத்தில் ஈடுபட்ட பொதுமக்கள், மாலை 5:00 மணிக்கு வீடு திரும்பினர்.

கடந்த நான்கு ஆண்டுகளாக குப்பை மேலாண்மைக்காக எந்த நடவடிக்கையும் எடுக்கப்படவில்லை. அ.தி.மு.க. ஆட்சியில், குப்பைகளை தரம் பிரிப்பதற்காக, 27 குப்பை தரம் பிரிக்கும் மையங்கள் அமைக்கப்பட்டன. இதில், இரண்டு மையங்கள் மட்டுமே தற்போது பயன்பாட்டில் உள்ளன. அனைத்து மையங்களும் முறையாக இயங்கி இருந்தால், இந்த அளவுக்கு குப்பை பிரச்னைகள் ஏற்பட்டிருக்காது.

63 வேலம்பாளையம், இச்சிப்பட்டி, முதலிபாளையம், இடுவாய் என, பல்லடம் தொகுதியை மையப்படுத்தியே குப்பை பிரச்னை உள்ளது. பல்லடம் தொகுதி மக்கள்தான் ஏமார்ந்தவர்களா... கோர்ட் நல்ல தீர்ப்பு வழங்கும் என்ற நம்பிக்கை உள்ளது. ஒருவேளை, அதில் மாறுதல் ஏற்பட்டு, மாநகராட்சி குப்பைகள் கொட்ட வந்தால், உங்களுடன் சேர்ந்து நானும் போராட்டத்தில் ஈடுபடுவேன். ஒருபோதும் இங்கு குப்பை கொட்ட விடக்கூடாது.

- ஆனந்தன்,

பல்லடம் எம்.எல்.ஏ.