''கட்டடங்களுக்கு புதிய மின் இணைப்புக்கான விண்ணப்பங்களில் மின் ஒப்பந்ததாரர் கைெயழுத்து தேவையில்லை என மின் வாரிய ஒழுங்குமுறை ஆணைய தலைவர் தெரிவித்தார்'' என்று மின் வாரிய ஒப்பந்த பணியாளர் சங்க செயலாளர் சரவணன் கூறினார்.

வீடு மற்றும் கட்டடங்களுக்கு புதிய மின் இணைப்பு பெற விண்ணப்பிக்கும் போது, உரிமம் பெற்ற ஒயரிங் ஒப்பந்ததாரரிடம் சோதனை அறிக்கை பெற வேண்டும் என்ற நடைமுறை இருந்தது. மின் இணைப்புக்கு விண்ணப்பிக்கும் நடைமுறை, 2016ல் ஆன்லைன் மயமாக்கப்பட்டது. புதிய மின் இணைப்புக்கு விண்ணப்பிக்கும் போது, பத்திர நகல், பட்டா நகல், சொத்துவரி, ஆதார், போட்டோ ஆகிய விவரங்களை கொண்டு, ஆன்லைன் மூலம் விண்ணப்பிக்க வழி செய்யப்பட்டது.

மக்களிடம் அதிருப்தி

சில மாதங்கள் முன், மின்சார ஒழுங்குமுறை ஆணையம், ஒயரிங் ஒப்பந்தாரரின் சான்றொப்பம் அவசியம் என்று அறிவுறுத்தியது. இது, லஞ்சத்துக்கும் இது வழிவகுப்பதாக இருந்தது. ஆன்லைனில் விண்ணப்பித்தும், நேரில் சென்று அலைய வேண்டிய நிலை கடும் சிரமத்தையும், மக்கள் மத்தியில் அதிருப்தியையும் ஏற்படுத்தியது.

தெளிவுபடுத்திய

ஆணைய தலைவர்

மின்வாரிய ஒப்பந்த பணியாளர் சங்க செயலாளர் சரவணன் மின் வாரிய ஒழுங்குமுறை ஆணைய தலைவர் மணிவண்ணனை சென்னையில் நேரில் சென்று சந்தித்து முறையிட்டார். சரவணன் கூறியதாவது:

ஏற்கனவே ஒரு அறிக்கையில், மின் இணைப்பு பெற உதவி மின் பொறியாளர் அல்லது ஒயரிங் ஒப்பந்ததாரர் கையெழுத்திட வேண்டும் என்று தான் தெரிவிக்கப்பட்டுள்ளது. ஒப்பந்ததாரர் கையெழுத்து அவசியம் என்று குறிப்பிடப்படவில்லை. மின் வாரியம் நிர்ணயித்துள்ள கட்டணம் மட்டுமே செலுத்தி நுகர்வோருக்கு எந்த கூடுதல் கட்டணமின்றி, விரைவாக உடனுக்குடன் இணைப்பு வழங்க வேண்டும்.

இணைப்பு பெற ஒப்பந்ததாரரிடம் அவசியம் கையெழுத்து பெற்று தான் இணைப்பு வழங்க வேண்டும் என எவ்வித உத்தரவும் பிறப்பிக்கப்படவில்லை என்று மின் வாரிய ஒழுங்குமுறை ஆணையத் தலைவர் தெளிவாக விவரித்தார். இவ்வாறு அவர் கூறினார்.