வனத்துக்குள் திருப்பூர் திட்டத்தின் கீழ், கடந்த 10 ஆண்டுகளில், 22 லட்சம் மரக்கன்றுகள் நடவு செய்து, பராமரிக்கப்பட்டு வருகிறது. நடப்பாண்டு, 11 வது திட்டத்தின் கீழ், 3 லட்சம் மரக்கன்றுகள் நடவு செய்ய இலக்கு நிர்ணயித்து, கடந்த மார்ச் 13ல் பணிகள் துவங்கின.

பருவ மழை ஒத்துழைப்பு, விவசாயிகள் மற்றும் பசுமை ஆர்வலர்கள் ஆர்வம் காரணமாக, நடப்பாண்டு இது வரை, 2 லட்சத்து, 68 ஆயிரத்து, 338 மரக்கன்றுகள் நடவு செய்யப்பட்டுள்ளது.

இதில், உடுமலை, மடத்துக்குளம், குடிமங்கலம் பகுதி விவசாயிகள் மற்றும் தொழில் துறையினர், உள்ளாட்சி அமைப்புகளின் நிர்வாகிகள், பசுமை ஆர்வலர்கள் ஆர்வம் காரணமாக, இப்பகுதிகளில், ஒரு லட்சத்து, 16 ஆயிரத்து 782 மரக்கன்றுகள் நடப்பட்டுள்ளன.

மாவட்டத்தில் அதிகளவு மரக்கன்றுகள் நடவு செய்த பகுதியாக உடுமலை மாறியுள்ள நிலையில், வட கிழக்கு பருவ மழையும் தீவிரமடைந்துள்ளதால், மரக்கன்றுகள் நடும் பணி முடுக்கி விடப்பட்டுள்ளது.

இத்திட்டத்தின் கீழ், உடுமலை வட பூதனத்தைச்சேர்ந்த விவசாயி முரளி கிருஷ்ணனுக்கு சொந்தமான நிலத்தில், பசுமை மற்றும் விவசாயிகளுக்கு பயன் அளிக்கும் வகையில், 300 பாக்குமரக்கன்றுகள் நடவு செய்யப்பட்டது.

அதே போல், மடத்துக்குளம், குமரலிங்கம் மாரிமுத்து- கிருஷ்ணம்மாள் ஆகியோருக்கு சொந்தமான நிலத்தில், 1,500 பாக்குமரக்கன்றுகள் நடவு செய்து தரப்பட்டுள்ளது.

மேலும், தனியார் நிறுவன துணை மின் நிலையத்தை பசுமையாக்கும் வகையில், பூளவாடியில் அமைந்துள்ள 'வாட்சன் இன்ப்ரா' நிறுவனத்திற்கு சொந்தமான துணை மின் நிலையத்தில், 100 மகா கனி, 80 தேக்கு, 50 சந்தனம், 10 இலுப்பை, 100 ஆயன், 10 மந்தாரை என, 250 மரக்கன்றுகள் நடவு செய்யப்பட்டது.

நிறுவன அலுவலர் ஈஸ்வரன் மற்றும் ஊழியர்கள் பங்கேற்றனர். இத்திட்டத்தின் கீழ் மரக்கன்றுகள் நடவு செய்து, பராமரிக்க விருப்பம் உள்ளவர்கள், 90474 56666 என்ற எண்ணில் தொடர்பு கொள்ளலாம், என திட்ட குழுவினர் தெரிவித்தனர்.