திருப்பூர் மற்றும் சுற்றுப்பகுதியில் ரேஷன் அரிசி கடத்துவது தொடர்ந்து நடந்த வண்ணம் உள்ளது. இதுகுறித்து குடிமைப் பொருள் வழங்கல் துறையினர், கூட்டுறவு துறையினர், உணவுபொருள் கடத்தல் தடுப்பு பிரிவினர், வருவாய் துறையினர், போலீசார் மற்றும் சமூக ஆர்வலர்களும் தொடர்ந்து கண்காணித்த வண்ணம் உள்ளனர். இருப்பினும் அரிசி கடத்தல் கும்பல் தங்கள் கைவரிசையை தொடர்கின்றனர். நேற்று திருப்பூரில் நொய்யல் ஆற்றின் கரையை ஒட்டி, அணைக்காடு பகுதியில் பயன்பாட்டில் இல்லாத எடை மேடை கட்டடம் உள்ளது. அதில், 15 சாக்கு மூட்டைகள் அடுக்கி வைக்கப்பட்டிருந்தன. அவ்வழியாகச் சென்றவர்கள் சோதனையிட்ட போது அதில் ரேஷன் அரிசி இருந்தது.

உடனடியாக குடிமைப் பொருள் வழங்கல் துறையினருக்கு தகவல் அளிக்கப்பட்டது. அலுவலர்கள் உடனடியாக சென்று பார்த்தனர். ஆனால், அதிகாரிகள் வருவதற்குள் அரிசி மூட்டைகள் மாயமாகின. இதனால், ஆய்வுக்குச் சென்ற அதிகாரிகள் அதிர்ச்சியும் அடைந்தனர். அருகில் இருந்த கண்காணிப்பு கேமரா பதிவுகள் குறித்தும் ஆய்வு நடத்தப்பட்டது.