அவிநாசி நகராட்சி அலுவலகத்தில் நேற்று பழைய பஸ் ஸ்டாண்டில் கட்டப்பட்டுள்ள புதிய வணிக வளாகத்திற்கான பொது ஏலம் நடந்தது.

நகராட்சி தலைவர் தனலட்சுமி, கமிஷனர் (பொறுப்பு) அருள் மற்றும் கவுன்சிலர்கள் பங்கேற்றனர்.

ஏலத்தில் கலந்து கொள்ள வந்திருந்தவர்களில் நான்கு பேரை மட்டும் தனது அறையில் அமர வைத்து ஏலத்தை துவங்குவதற்கான நடவடிக்கையை கமிஷனர் மேற்கொண்டார்.

கமிஷனர் - கவுன்சிலர் இடையே வாக்குவாதம் காங். கவுன்சிலர் கோபாலகிருஷ்ணன் உள்ளிட்டோர், பகிரங்க ஏலத்தை பொதுவெளியில் நடத்த வேண்டும் என கடும் எதிர்ப்பு தெரிவித்தனர். இதனால் கமிஷனர் - கவுன்சிலர் இடையே வாக்குவாதம் ஏற்பட்டது.

இந்நிலையில், தன்னை ஒருமையில் பேசி அவமானப்படுத்தி அலுவலகத்தை விட்டு வெளியே போ என கமிஷனர் கூறியதால் அவிநாசி போலீசாரிடம் கவுன்சிலர் கோபாலகிருஷ்ணன் புகார் அளித்தார்.

அவர் கூறியதாவது: பொது ஏலம் என பகிரங்கமாக அறிவித்துவிட்டு ஒரு அறைக்குள் ஏலத்தை நடத்துவது எதற்காக? அவ்வாறு நடத்துவதற்கான காரணம் என்ன என கமிஷனரிடம் கேட்டேன்.

கடந்த 30 ஆண்டுகளுக்கும் மேலாக நடைபெற்ற அனைத்து ஏலங்களும் பகிரங்கமாக பொதுவெளியில் நடந்தது.

இதுவரை இல்லாத நடைமுறையை எதற்காக கொண்டு வர வேண்டும் என எதிர்ப்பு தெரிவித்தேன்.

அதற்கு கமிஷனர் 'பொதுவெளியில் ஏலம் நடத்த முடியாது. ஏலம் நடத்துவது எனது இஷ்டம். எனது அதிகாரத்துக்குட்பட்டது. உனக்கெல்லாம் பதில் சொல்ல வேண்டிய அவசியம் இல்லை. எனது அலுவலகத்தை விட்டு வெளியில் போ' என ஒருமையில் என்னை மிரட்டும் வகையில் பேசினார்.

மக்களால் தேர்ந்தெடுக்கப்பட்ட ஒரு கவுன்சிலரை 'நகராட்சி அலுவலகத்தில் இருந்து வெளியில் போ என எப்படி சொல்லலாம்' என கேட்டேன்.

அதற்கு 'நீ நகராட்சி நிர்வாக இயக்குனரிடம் போய் வேண்டுமானால் புகார் கூறிக்கொள். அப்படித்தான் பேசுவேன்' என மிரட்டும் வகையில் என்னை அவமானப்படுத்தினார். இதனால் அவிநாசி போலீசாரிடம் கமிஷனர் அருள் மீது நடவடிக்கை எடுக்கும்படி புகார் அளித்துள்ளேன்.

இவ்வாறு, அவர் கூறினார்.

இதுதொடர்பாக, நகராட்சி கமிஷனர் அருளை மொபைல்போனில் தொடர்பு கொண்டபோது, அவர் அழைப்பை ஏற்கவில்லை.