உடுமலை நகராட்சி அவசரக்கூட்டம் கூட்ட அரங்கில், நேற்று துணைத்தலைவர் கலைராஜன் தலைமையில் நடந்தது.

கூட்டத்தில், வார்டு அளவில் நடத்தப்பட்ட சிறப்புக்கூட்டங்களில், மக்கள் தெரிவித்த கோரிக்கை அடிப்படையில், 23 இடங்களில் பணிகளை மேற்கொள்ளவும், துாய்மைப்பணியாளர்களுக்கான உணவு வழங்கும் திட்டத்துக்கு, உணவு வழங்கும் நிறுவனத்தை தேர்வு செய்யவும் விவாத பொருள் வைக்கப்பட்டது.

இது குறித்து கவுன்சிலர்கள் பேசியதாவது:

ஆசாத் (தி.மு.க.,): திட்ட பணிகளுக்கான ஒப்பந்தங்களை தேர்வு செய்வதில், அதிகாரிகள் வெளிப்படையாக நடந்து கொள்வதில்லை. கூர்ந்தாய்வுக்குழுவினரால், கூர்ந்தாய்வு செய்யப்பட்டதாக மன்ற பொருளில் தெரிவிக்கப்பட்டுள்ளது. அத்தகைய குழு உள்ளதா; தேர்வு செய்யப்பட்ட நிறுவனத்தில் ஆய்வு மேற்கொண்டனரா என்பது குறித்து எவ்வித தகவலும் இல்லை.

சிறப்பு வாய்ந்த திட்டத்தை செயல்படுத்தும் நிறுவனத்தின் தகவல்கள் கூட முறையாக இல்லை. நகராட்சி கூட்டத்துக்கும் அவசரகதியில் தகவல் அனுப்புகின்றனர். முன் அனுபவம் இல்லாத நிறுவனங்களுக்கு டெண்டர் வழங்கினால், அரசின் பெயர் கெட்டுவிடும்.

வேலுச்சாமி (தி.மு.க.,): நகராட்சிக்கூட்டத்துக்கு தாமதமாக தகவல் அனுப்பும் முறையை அதிகாரிகள் கைவிட வேண்டும்.

அதிகாரிகள் தரப்பில், 'துாய்மைப்பணியாளர்களுக்கு உணவு வழங்கும் திட்டத்துக்கான நிறுவனத்தேர்வு முறையான வழிகாட்டுதல்படியே நடைபெற்றுள்ளது. நிறுவனத்தின் முன் அனுபவம் மற்றும் இதர விபரங்கள் அனைத்தும் மக்கள் பிரதிநிதிகள் கேட்டால் தெரியப்படுத்தப்படும்,' என்றனர்.

இதையடுத்து, வளர்ச்சிப்பணிகள் மற்றும் உணவு வழங்கும் திட்டத்துக்கான நிறுவன தேர்வுக்கு ஒப்புதல் தெரிவித்து தீர்மானம் நிறைவேற்றப்பட்டது.