திருப்பூர் நஞ்சராயன் குளம், 2021ல், தமிழகத்தின், 16வது பறவைகள் சரணாலயமாக அறிவிக்கப்பட்டது. தொடர்ச்சியாக உலகளாவிய ராம்சார் அங்கீகாரமும் வழங்கப்பட்டது.

தற்போது மத்திய அரசு வழிகாட்டுதல் படி, உணர்திறன் மண்டல எல்லை வரையறை தொடர்பான நடவடிக்கை எடுக்கப்பட்டுள்ளது.

வெளிநாட்டு பறவைகள் சரணாலய அந்தஸ்து பெற்ற எந்தவொரு பகுதியின் எல்லையை ஒட்டியும், அதிகபட்சம், 10 கி.மீ., சுற்றளவுக்கு, பாதிப்பு ஏற்படுத்தும் குவாரிகள், அதிக ஒலி எழுப்பும் மற்றும் அதிக சாயநீர் வெளியேற்றும் நிறுவனங்கள், அதிகளவு சாக்கடை, கழிவுநீர் வெளியேற்றும் ஹோட்டல், ரிசார்ட் உள்ளிட்ட கட்டுமானங்கள் இருக்கக்கூடாது என்பது, மத்திய அரசின் சுற்றுச்சூழல் உணர்திறன் மண்டல மசோதா சொல்லும் விதி.

அதன் அடிப்படையில், நஞ்சராயன் குளத்துக்கு வரும் பறவைகளுக்கு எவ்வித பாதிப்பும் ஏற்படாத வகையிலும், வெளிநாட்டு பறவைகளின் வலசை தடைபடாமல் இருக்கவும், சரணாலயத்தின் உயிர்ச்சூழல் மண்டலம் பாதிக்கப்படக்கூடாது என்ற நோக்கில், அதன் எல்லையை, சுற்றுச்சூழல் உணர்திறன் மண்டலமாக அறிவிப்பதற்குரிய நடவடிக்கையை மாவட்ட நிர்வாகம் மேற்கொண்டுள்ளது.

கருத்துக்கேட்பு கூட்டம் இதற்கென கலெக்டர் தலைமையில், மாவட்ட வன அலுவலர், நீர்வளத்துறை, வருவாய்த்துறை, மாசுக்கட்டுப்பாடு வாரியம், ஊரக வளர்ச்சி முகமை உள்ளிட்ட சம்பந்தப்பட்ட துறை சார்ந்த அலுவலர்கள் மற்றும் தன்னார்வ அமைப்பினரை உள்ளடக்கி குழு அமைக்கப்பட்டது.

இக்குழு நஞ்சராயன் குளத்தையொட்டி உள்ள குடியிருப்புகள், தொழிற்சாலைகள், அவற்றால் குளத்துக்கு ஏற்படும் சாதக, பாதகம் உள்ளிட்ட அனைத்து விஷயங்களையும் அலசி ஆராய்ந்தனர்.

பின், சரணாலயத்தை ஒட்டியுள்ள பகுதிகளில் வசிக்கும் மக்களிடம், நவ., 12ம் தேதி கருத்துக்கேட்பு கூட்டமும் நடத்தினர்.

கலெக்டர் மனீஷ் நாரணவரே தலைமையில், நேற்று முன்தினம் நஞ்சராயன் பறவைகள் சரணாலயத்திற்கான சுற்றுச்சூழல் உணர்திறன் மண்டலத்தை அறிவிப்பதற்குரிய வரைவு முன்மொழிவு தயாரிக்கப்பட்டு, தொடர்புடைய அனைத்து துறை அதிகாரிகளின் ஒப்புதல் பெறப்பட்டது.

இந்த ஒப்புதல், வனத்துறை உயரதிகாரிகள் வாயிலாக மத்திய அரசின் வனத்துறை ஒப்புதலுக்கு அனுப்பி வைக்கப்பட்டு, பின், சுற்றுச்சூழல் உயிர்மண்டல பகுதியாக அறிவிக்கப்படும்.