திருப்பூர் ரயில்வே ஸ்டேஷனுக்கு வடமாநிலங்களில் இருந்து, தினமும், 5 ஆயிரம் பேர் வருகின்றனர். 3 ஆயிரம் பேர் திருப்பூரில் இருந்து பல்வேறு பகுதிகளுக்கு செல்கின்றனர். அருகில் உள்ள கோவை, ஈரோடு மற்றும் சேலம் மாவட்டங்களுக்கு சென்று, அதே நாளில் திரும்புவோராக, 2,500க்கும் மேற்பட்டோர் உள்ளனர்.

பயணிகள் எண்ணிக்கை தொடர்ந்து அதிகரிக்கும் நிலையில், திருட்டு சம்பவங்களும் அவ்வப்போது நடக்கிறது. குறிப்பாக, மொபைல் போன் பறிப்பு தொடர்கிறது. அடிக்கடி வரும் புகார்களை அடுத்து, ரயில்வே ஸ்டேஷனுக்கு வரும் பயணிகளுக்கு விழிப்புணர்வு ஏற்படுத்தும் வகையில், டிக்கெட் கவுன்டர் அருகே ரயில்வே பாதுகாப்பு படையினர் விழிப்புணர்வு பிளக்ஸ் பேனர் வைத்துள்ளனர்.

பயணிகளின் கனிவான கவனத்துக்கு... l ஏ.சி. படுக்கை வசதி பெட்டியில் மொபைல் போனுக்கு சார்ஜர் போட்டு விட்டு துாங்கி விட வேண்டாம்.

l ரயில் படிக்கட்டுகளில் மொபைல் போனில் பேசியபடி, நின்று, அமர்ந்து கொண்டிருந்தால், அதனை தட்டி பறிக்க முயற்சிகள் நடக்கிறது; கவனம் தேவை.

l ரயில்வே ஸ்டேஷன் பிளாட்பார்மில் அமர்ந்திருக்கும் போது, உங்கள் பேக்குகளை கவனமாக வைத்துக் கொள்ள வேண்டும். அசந்த நேரத்தில் பேக்கில் இருந்து பொருட்களை திருட வாய்ப்புகள் உள்ளது.

l ரயிலில் ஏறியவுடன் லக்கேஜ்களை அதற்கான இடத்தில் வைத்து பூட்டி விடுவது பாதுகாப்பை உறுதி செய்யும்.

l நகை அணிந்து ஜன்னல் ஓர இருக்கையில் அமரும் போது கவனம் தேவை.

l ரயில் படிக்கட்டில் நின்றபடி கைப்பை வைத்திருந்தால், அதனை பறித்து செல்ல, திருட வாய்ப்புகள் உள்ளது.

l ரயிலில் ஏறும் போதும், இறங்கும் போதும் பர்ஸ், போன் பத்திரமாக இருப்பதை உறுதி செய்து கொள்ளவேண்டும்.

l பிளாட்பார்மில் காத்திருக்கும் போது சற்று அசந்தால், உங்கள் கைப்பை மற்றும் உடைமைகள் உள்ள பைகள் காணாமல் போகும் வாய்ப்புள்ளது. எனவே, பைகளின் மீது கவனம் இருக்க வேண்டும்.