திருப்பூர் மாவட்ட பகுதிகளில் கால்நடைகளின் எண்ணிக்கை பெருமளவு குறைந்துள்ளது. போதுமான ஆடுகள் கிடைக்காததால் ராஜஸ்தான் உள்ளிட்ட வெளி மாநிலங்களில் இருந்து ஆடுகளை வியாபாரிகள் கொண்டு வருகின்றனர். பெரும்பாலான விவசாயிகள் காய்கறி, சிறுதானியம், பயறு வகைகள் உள்ளிட்ட பயிர் சாகுபடியை குறைத்து விட்டு, தென்னை சாகுபடிக்கு மாறி விட்டனர்.

புற்களை மேய கால்நடைகள் இல்லாததால் புற்கள் வளரத் துவங்கி விட்டன. அவற்றை விவசாயிகள் களையாக பார்க்கத் துவங்கி விட்டனர். கால்நடைகள் மேய்ந்து அழித்த புல் வகைகளை விவசாயிகள் களைக்கொல்லிகளை கொண்டு அழித்து வருகின்றனர். புற்களை கால்நடைகள் சாப்பிட்டால் அவற்றின் கழிவுகள் மண்ணுக்கு உரமாக மாறுகிறது. ஆனால், புற்களை அழிக்க தொடர்ந்து களைக்கொல்லிகளை தெளிப்பதாலும், அவற்றின் பயன்பாடு ஆண்டுதோறும் பெருகி வருவதாலும் மண்வளம், நீர் வளம் கெட்டு வருகிறது.

வளம் குன்றா வேளாண்மை இனி சாத்தியம் இல்லாத நிலை ஏற்பட்டு வருகிறது. மண் மலடாக மாறி விளைச்சல் வீழ்ச்சி அடைவதற்கு முன் அரசு இதற்கு முற்றுப்புள்ளி வைக்குமா என்ற எதிர்பார்ப்பு விவசாய ஆர்வலர்கள் மத்தியில் எழுந்துள்ளது.