விழுப்புரம் மாவட்ட அ.தி.மு.க., சார்பில், ஆரோவில் பஸ் நிலையம் அருகே கடந்த 2023ம் ஆண்டு மார்ச் 10ம் தேதி, கோட்டக்குப்பம் நகராட்சி திடலில் மே 1ம் தேதியும் தேதியும் பொதுக்கூட்டங்கள் நடந்தது.

இந்த கூட்டங்களில் பங்கேற்ற முன்னாள் அமைச்சர் சண்முகம் தமிழக அரசையும், முதல்வர் ஸ்டாலினையும் அவதுாறாகவும் பேசியதாக புகார் எழுந்தது.

இதுதொடர்பாக, சண்முகம் மீது, விழுப்புரம் மாவட்ட முதன்மை நீதிமன்றத்தில், அரசு வழக்கறிஞர் சுப்ரமணியம், தனித்தனியாக வழக்கு தொடர்ந்தார்.

வழக்கு விசாரணை, விழுப்புரம் மாவட்ட முதன்மை நீதிமன்றத்தில் நடந்து வருகிறது. நேற்று மீண்டும் இவ்வழக்கு விசாரணைக்கு வந்தது.

அப்போது சண்முகம் ஆஜராகவில்லை. அ.தி.மு.க., வழக்கறிஞர்கள் ராதிகா, தமிழரசன் ஆகியோர் ஆஜராகி, இவ்வழக்குகளை ரத்து செய்யக்கோரி, சுப்ரீம் கோர்ட்டில் முறையிட்டுள்ளதால், அதன் மீதான உத்தரவு வரும் வரை, இங்கு நடக்கும் விசாரணையை ஒத்திவைக்கும்படியும் கோரினர்.

விசாரித்த மாவட்ட திபதி மணிமொழி, விசாரணையை வரும் ஜனவரி 5ம் தேதிக்கு ஒத்திவைத்து உத்தரவிட்டார்.