தமிழகத்தில் 234 தொகுதிகளிலும் வாக்காளர் பட்டியல் சிறப்பு திருத்தம் நவ.4 முதல் துவங்கி நடந்து வருகிறது. விருதுநகர் மாவட்டத்தில்7 சட்டசபை தொகுதிகளிலும் உள்ள 16 லட்சத்து 26 ஆயிரத்து 485 பேருக்கு 1901 ஓட்டு சாவடி அலுவலர்கள், அங்கீகரிக்கப்பட்ட அரசியல் கட்சிகளின் முகவர்களுடன் சென்று எஸ்.ஐ.ஆர் படிவங்களை வழங்கினர். நேற்று வரை 99 சதவீத படிவங்கள் மக்களிடம் வழங்கப்பட்டு, பூர்த்தி செய்யப்பட்ட படிவங்கள் திரும்பப் பெறப்பட்டு பதிவேற்றம் செய்யப்பட்டு வருகிறது.

நேற்று காலை 8:00 மணி நிலவரப்படி ராஜபாளையத்தில் 79.43, ஸ்ரீவில்லிபுத்துாரில் 80.50, சாத்துாரில் 84.76, சிவகாசியில் 81.23, விருதுநகரில் 68.62, அருப்புக்கோட்டையில் 85.55, திருச்சுழியில் 89.91 சதவீதமும், மாவட்ட அளவில் ஒட்டுமொத்தமாக 81. 39 சதவீத படிவங்கள் பதிவேற்றப்பட்டுள்ளது. மாவட்டம் முழுவதும் அரசு ஊழியர்கள் இப்பணியில் மிகுந்த அக்கறையுடன் தீவிரமாக படிவங்களை பதிவேற்றம் செய்து வருகின்றனர்.

இருந்தபோதிலும் இன்னும் 19 சதவீத படிவங்களை திரும்ப பெற வேண்டிய நிலை அதிகாரிகளுக்கு உள்ளது. இதற்காக இன்று வரை ஓட்டுச்சாவடிகள் தோறும் சிறப்பு முகாம்கள் நடத்தப்படுகிறது.

இப்பணி முடிவடைய இன்னும் 4 நாட்கள் மட்டுமே உள்ள நிலையில் இன்னும் ஒவ்வொரு ஓட்டுச் சாவடி தோறும் நூற்றுக்கும் மேற்பட்ட படிவங்களை வாக்காளர்கள் திரும்பக் கொடுக்காமல் அலட்சியமாக உள்ளனர். டிச. 4க்குள் கொடுக்காவிட்டால் டிச. 9 அன்று வெளியாகும் வரைவு வாக்காளர் பட்டியலில் ஓட்டு உரிமை இல்லாத நிலை ஏற்படும் அபாயம் உள்ளது.

எனவே, இதுவரையும் படிவங்களை திரும்ப வழங்காத வாக்காளர்கள் கால தாமதமின்றி சம்பந்தப்பட்ட ஓட்டு சாவடி அலுவலர்களிடம் வழங்குவது மிகவும் அவசியமாகும்.