தமிழகத்தில் பட்டாசு ஆலைகளில் விபத்துகள் ஏற்படுவதை தடுக்கவும், பட்டாசு தொழிலாளர்கள் பாதுகாப்புக்காக தமிழ்நாடு பட்டாசு தொழில் கழகம் உருவாக்கவும், பட்டாசு ஆலை விபத்துகளை தடுப்பது மற்றும் சட்டவிரோத பட்டாசு உற்பத்தியை தடுக்க ஒருங்கிணைந்த கொள்கை வகுக்க உத்தரவிடக்கோரி மதுரையை சேர்ந்த வழக்கறிஞர் செல்வகுமார் உயர் நீதிமன்ற மதுரை அமர்வில் பொதுநல வழக்கு தொடர்ந்தார்.

பட்டாசு ஆலை வெடி விபத்தில் தந்தையை இழந்த சாத்துார் மேலதாயில்பட்டியை சேர்ந்த சட்ட கல்லுாரி மாணவி ராஜாத்தி, பட்டாசு ஆலை விபத்துக்களை தடுக்க கோரி 2014 ல் உயர்நீதிமன்ற மதுரை கிளை பதிவாளருக்கு கடிதம் எழுதினார். இதனடிப்படையில் 2014 ல் உயர்நீதிமன்றம் தாமாக முன்வந்து பொதுநல வழக்காக விசாரணைக்கு எடுத்தது.

இரு வழக்குகளையும் சேர்த்து விசாரித்த நீதிபதிகள் அனிதா சுமந்த், குமரப்பன் தலைமையிலான அமர்வு இவ்வழக்கில் நீதிமன்றத்திற்கு உதவி செய்யும் வகையில் (அமிகஸ் கியூரி) வழக்கறிஞர் கீதாவை நியமித்தது. சிவகாசி பகுதியில் உள்ள சிறு, நடுத்தர மற்றும் பெரிய பட்டாசு ஆலைகளில் நவ. 28, 29 அவர் ஆய்வு செய்து அறிக்கை தாக்கல் செய்ய உத்தரவிட்டனர். அதன்படி நேற்று அவர் சிவகாசி பகுதியில் உள்ள பட்டாசு ஆலைகளில் ஆய்வு செய்தார்.

வேதிப்பொருட்கள், வெடிமருந்து கலவை, மருந்து செலுத்துதல் குறித்து கேட்டறிந்தார். பாதுகாப்பு வசதிகள், கட்டமைப்பு உள்ளிட்டவைகளையும் ஆய்வு செய்தார். தொடர்ந்து இன்றும் ஆய்வு நடத்த உள்ளார். வெடிபொருள், கட்டுப்பாட்டு அதிகாரி கோவிந்தராம் உடன் இருந்தார்.

கீதா கூறுகையில், இரு நாட்கள் ஆய்வுக்கு பின் நீதிமன்றத்தில் அறிக்கை சமர்ப்பிக்க உள்ளேன், என்றார்.