அவர் மேலும் கூறியதாவது:

மருத்துவ பணியாளர் தேர்வு வாரியத்தால் (எம்.ஆர்.பி.,) நிரப்ப வேண்டிய 1500 செவிலியர் பணியிடங்கள், 1000 ஒப்பந்த பணியிடங்களும் காலியாக உள்ளது. இந்திய மருத்துவ ஆணையம், இந்திய பொது சுகாதார தர நிர்ணயங்களின் பரிந்துரைப்படி நோயாளிகளின் எண்ணிக்கைக்கு ஏற்ப செவிலியர்கள், மருத்துவ ஊழியர்கள் பணியிடங்கள் உருவாக்கப்படவில்லை.

நிதி ஆயோக் 2022ன் அறிக்கையில், தமிழகத்தில் மாவட்ட தலைமை அரசு மருத்துவமனைகளில் மருத்துவர்கள் எண்ணிக்கையில் 0.78 சதவீதம் குறியீடு பெற்று நாட்டில் 20வது இடமும், செவிலியர்கள் எண்ணிக்கையில் 0.48 பெற்று 29வது இடமும் பெற்றுள்ளது.

தி.மு.க., அரசு பொறுப்பேற்றது முதல் புதிய பணியிடங்கள் எதுவும் உருவாக்கப்படவில்லை. புதிதாக திறக்கப்பட்ட கருணாநிதி நுாற்றாண்டு, பெரியார் நகர் மருத்துவமனை, புதிதாக தரம் உயர்த்தப்பட்ட மருத்துவமனைகளில் பிற மருத்துவமனைகளில் இருந்து மருத்துவர்கள், செவிலியர்கள் மீள் பணியில் அமர்த்தப்பட்டுள்ளனர்.

வார்டுகள், தீவிர சிகிச்சை பிரிவுகளில் மூன்று செவிலியர்கள் இருக்க வேண்டிய இடத்தில் ஒருவருக்கான பணியிடம் மட்டுமே உள்ளது.

2780 படுக்கைகள் உள்ள மதுரை அரசு மருத்துக்கல்லுாரியில் 560 செவிலியர்கள், 1550 படுக்கைகள் உள்ள செங்கல்பட்டு அரசு மருத்துவக்கல்லுாரியில் 180 செவிலியர்கள், 1700 படுக்கைகள் உள்ள திருச்சி காந்தி நினைவு மருத்துவமனையில் 215 பேர் மட்டுமே பணியில் உள்ளனர்.

இது போன்று பல அரசு மருத்துவக்கல்லுாரிகளில் நோயாளிகளின் எண்ணிக்கைக்கு ஏற்ப செவிலியர்கள், மருத்துவ ஊழியர்கள் பணியிடங்கள் இல்லை.

அரசு ஆரம்ப சுகாதார நிலையங்கள் 70 சதவீதத்திற்கும் மேல் தொகுப்பூதிய பணியாளர்களை வைத்து செயல்படுகிறது.

எனவே நோயாளிகளின் எண்ணிக்கைக்கு ஏற்ப நிரந்தர மருத்துவர், செவிலியர், மருத்துவ ஊழியர்கள் பணியிடங்களை உருவாக்குவதுடன் தொகுப்பூதியம், ஒப்பந்தத்தில் பணிபுரியும் செவிலியர், ஊழியர்களை பணிநிரந்தரம் செய்ய அமைச்சர் நடவடிக்கை எடுக்க வேண்டும், என்றார்.