நரிக்குடி வழியாக பார்த்திபனூர், அருப்புக்கோட்டை , திருச்சுழி, திருப்புவனம், கமுதி, அபிராமம் உள்ளிட்ட ஊர்களுக்கு ஏராளமான அரசு, தனியார் பஸ்கள் வந்து செல்கின்றன. சுற்றியுள்ள கிராமங்களில் இருந்து ஏராளமான பயணிகள் பல்வேறு ஊருக்கு செல்ல நரிக்குடி வருகின்றனர்.

திறந்த வெளியாக இருப்பதால் பயணிகள் வெயில், மழைக்கு சிரமத்திற்கு ஆளாகின்றனர். இந்நிலையில் வாடகை ஆட்டோ, கார், டூவீலர்கள், லாரி என பஸ் ஸ்டாண்டில் நிறுத்தி இடையூறு ஏற்படுத்துகின்றனர்.

பல்வேறு ஊர்களுக்கு செல்லும் டவுன் பஸ்கள் நின்று செல்ல இட வசதி இன்றி டிரைவர்கள் சிரமப்படுகின்றனர். மாற்று இடத்தில் நிறுத்துவதால் பஸ் வந்து செல்வதை பயணிகள் கவனிக்காமல், தவற விடுகின்றனர். நீண்ட நேரம் காத்திருக்க வேண்டிய சூழ்நிலை ஏற்படுகிறது.

சில நேரங்களில் பஸ்களை பிடிக்க அங்கும் இங்கும் ஓட வேண்டிய சூழ்நிலை ஏற்படுகிறது. பஸ் ஸ்டாண்டில் கட்டுப்பாடின்றி குறுக்கும் நெடுக்கமாக ஓட்டிச் செல்வதால் பயணிகளுக்கு சிரமத்தை ஏற்படுத்தி வருகின்றனர். அடிக்கடி விபத்து ஏற்படுகிறது. இதனை தவிர்க்க தனியார் வாகனங்களை பஸ் ஸ்டாண்டில் நிறுத்துவதை கண்காணித்து தடுக்க நடவடிக்கை எடுக்க வேண்டும் என அரசு பஸ் டிரைவர்கள் எதிர்பார்க்கின்றனர்.