மாவட்டத்தில் கடந்த சில நாட்களாக வெயிலின் தாக்கம் இல்லாமல் குளிர்ச்சியான சீதோஷ்ண நிலையும், பனி மூட்டமும் நிலவுகிறது. நேற்று முன்தினம் காலை முதல் சாரல் மழை பெய்தது. ஆனால் மாலை 6:00 மணிக்கு மேல் மழை கொட்டி தீர்த்தது.

இதனால் நகர், புறநகர், ஊரகப்பகுதிகளில் தாழ்வான இடங்களில் தண்ணீர் தேங்கி போக்குவரத்து, மக்கள் பாதிக்கப்பட்டனர். மேலும் கண்மாய்களுக்கு தண்ணீரை கொண்டுவரும் நீர்வரத்து கால்வாய்களில் வரத்து அதிகரிப்பால் தற்போது பல கண்மாய்கள் வேகமாக நிரம்பி வருகிறது.

மேலும் நேற்று காலை 8:00 மணி நிலவரப்படி திருச்சுழியில் 14.40 மி.மீ., ராஜபாளையம் 3, காரியாபட்டி 12, ஸ்ரீவில்லிப்புத்துார் 1.30, விருதுநகர் 13, சாத்துார் 12.20, பிளவக்கல் 3.40, வத்திராயிருப்பு 5, கோவிலான்குளம் 13.20, வெம்பக்கோட்டை 8, அருப்புக்கோட்டை 14 மி.மீ., மழையளவு பதிவானது. அதிகபட்சமாக சிவகாசியில் 52 மி.மீ., மழை பெய்தது. நேற்று காலை முதல் தொடர்ந்து மழை பெய்து வந்ததால் மக்கள் வீடுகளை விட்டு வெளியே வருவதற்கு தயங்கினர்.

ராஜபாளையம் நகராட்சியின் குடிநீர் ஆதாரமான 6வது மை நீர்த்தேக்கம் நிறைந்ததால் ஆற்றின் உபரி நீர் கண் நோய்களுக்கு பாய்ந்து வருகிறது. புதுக்குளம், புளியங்குளம், பிரண்டை குளம், கருங்குளம், கொல்லங் கொண்டான் பெரிய கண்மாய், தேவதானம் சாஸ்தா கோயில் நீர்த்தேக்கம் என நிரம்பி வழிகிறது.

பல்வேறு பகுதிகளிலும் கண்மாய் ஒட்டிய பாசன விவசாயிகள் 15 முதல் 20 நாட்கள் வரை பயிர்களை வளர்த்து கண்மாய் நீர் பாசனத்தை எதிர்பார்த்து இருந்தனர். தொடர் மழை நீர்வரத்தினால் நெல் சாகுபடியில் ஈடுபடும் விவசாயிகள் மகிழ்ச்சியில் உள்ளனர்.