ரோடுகளை ஆக்கிரமிப்பு செய்யாத வகையில் டிராபிக் போலீசார் கண்காணிக்க வேண்டும். நகரில் இருக்கின்ற ரோடுகளை முழுமையாக அகலப்படுத்தி புதியதாக ரோடு போட வேண்டும். ஒவ்வொரு ஆண்டும் நகராட்சி நெடுஞ்சாலை துறை போலீஸ் இணைந்து கட்டாயமாக ஆக்கிரமிப்புகளை அகற்ற வேண்டும்.

அருப்புக்கோட்டை: -: அருப்புக்கோட்டையில் முக்கிய பஜார் பகுதிகள், ரோடு ஓரங்கள், தெருக்களில் ஆக்கிரமிப்புகள் செய்வது தொடர்கதையாக உள்ளதால் போக்குவரத்திற்கு இடைஞ்சல் ஏற்படுவதுடன் தினமும் ஒரு விபத்து நடப்பதை நகராட்சி, நெடுஞ்சாலைத்துறை அதிகாரிகளும் வேடிக்கை பார்க்கின்றனர்.

அருப்புக்கோட்டையில் மதுரை ரோடு, திருச்சுழி ரோடு, விருதுநகர் ரோடு, அண்ணாதுரை சிலை பகுதி, தெற்கு தெரு, பழைய புதிய பஸ் ஸ்டாண்டுகள் உள்ளிட்ட பகுதிகள் போக்குவரத்து அதிகம் உள்ள பகுதிகள். இந்தப் பகுதிகளில் வர்த்தக நிறுவனங்கள் பலதரப்பட்ட கடைகள் உள்ளிட்டவைகள் இருப்பதால் தினமும் ஆயிரக்கணக்கான மக்கள், வாகனங்கள் வந்து செல்லும்.

ரோடுகளும் குறுகிய அமைப்பில் உள்ளது. காலை மாலை நேரங்களில் நூற்றுக்கணக்கான பள்ளி, கல்லூரி வாகனங்கள் வந்து செல்கின்றன.

இதனால், போக்குவரத்து நெரிசல் ஏற்படுகிறது. அனைத்து பஸ்களும் கனரக வாகனங்களும் நகருக்குள் வந்து செல்வதாலும், நாளுக்கு நாள் வாகனங்களின் எண்ணிக்கை கூடிக் கொண்டே செல்வதாலும் ரோட்டில் மக்கள் நடக்க முடியாத நிலையில் உள்ளது.

குறுகலான ரோடாக இருப்பதால் வாகனங்கள் வந்து செல்ல சிரமம் ஏற்படுகிறது. இதில் ரோட்டின் இருபுறமும் உள்ள கடைகளின் சன் ஷேடுகளை நீட்டித்துள்ளனர். கடைகளை ரோடு வரை ஆக்கிரமிப்பு செய்தும் உள்ளனர்.

இது தவிர நடைபாதை கடைக்காரர்கள் நடைபாதையை ஆக்கிரமிப்பு செய்து கடைகளை பரப்பியுள்ளனர். தினமும் நடைபாதை கடைகளின் எண்ணிக்கை கூடிக்கொண்டே செல்வதால் போக்குவரத்திற்கு இடைஞ்சல் அடிக்கடி ஏற்படுகிறது. அண்ணா சிலை பகுதி முழுவதும் உச்சகட்ட ஆக்கிரமிப்பில் உள்ளது.

15 ஆண்டுகளாக நகரில் ஆக்கிரமிப்புகளை அகற்ற எந்த வித நடவடிக்கையும் எடுக்கவில்லை. 2024 ல், நகராட்சி, நெடுஞ்சாலை துறை, வருவாய் துறை, போலீஸ் இணைந்து மேம்போக்காக ஆக்கிரமிப்புகளை அகற்றினர். இனிமேல் ஆக்கிரமிப்பு செய்யக்கூடாது என கடமைக்கு கூறிவிட்டு சென்றனர்.

சில நாட்களில் மீண்டும் ஆக்கிரமிப்புகள் தலைவிரித்து ஆடுகிறது. ஒரு வழிப் பாதையாக இருக்கும் தெற்கு தெருவில் தற்போது ஆக்கிரமிப்பு செய்யப்பட்டு வாகனங்கள் செல்ல முடியாமல் திணறுகிறது.

காந்திநகர் பகுதியில் ரோடு அகலமாக இருந்தும் சிறிது சிறிதாக ஆக்கிரமிப்பு செய்யப்பட்டு வருவதை நெடுஞ்சாலை துறையினர் கண்டு கொள்வதில்லை.

நகராட்சியும் நெடுஞ்சாலை துறையும் மெத்தனமாக இருப்பதால் ஆக்கிரமிப்பாளர்கள் துணிந்து ஆக்கிரமிப்பு செய்துள்ளனர்.

அதிகாரிகள் மெத்தனம் ராமமூர்த்தி, விவசாயி: அருப்புக்கோட்டை நகரில் ஆக்கிரமிப்புகள் அதிக அளவில் உள்ளது. இவற்றை அகற்றுவதில் அதிகாரிகள் மெத்தனமாக உள்ளனர். இதனால் போக்குவரத்திற்கு சிரமமாக உள்ளது. ரோடும் மோசமான நிலையில் உள்ளது. தற்போது உள்ள சூழ்நிலையில் ரோட்டிலும் நடக்க முடியவில்லை.

மக்கள் நடைபாதையை பயன்படுத்தவும் முடியவில்லை. ஆக்கிரமிப்பில் நகர் சிக்கி தவிக்கிறது. அதிகாரிகளின் அலட்சியத்தால் ஆக்கிரமிப்பாளர்கள் சுதந்திரமாக ஆக்கிரமிப்பு செய்கின்றனர்.

ரணகளமான ரோடுகள் ஜெயராஜ், வீடியோகிராபர்: நகரில் ஆக்கிரமிப்புகளை போர்க்கால அடிப்படையில் அகற்ற சம்பந்தப்பட்ட துறையினர் உடன் நடவடிக்கை எடுக்க வேண்டும். நகரில் பாதாள சாக்கடை திட்டப்பணிகள், குடிநீர் குழாய் பணிகளால் பல பகுதிகளில் ரோடுகள் ரணகளமாக உள்ளது. இதில் மழை பெய்து ரோடு மேலும் சேதம் அடைந்துள்ளது.

மதுரை ரோடு, அண்ணாதுரை சிலை, திருச்சுழி ரோடு, தெற்கு தெரு உள்ளிட்ட பகுதிகளில் டூவீலர்களில் கூட கடக்க முடியாமல் சிரமப்பட வேண்டியுள்ளது. ஆக்கிரமிப்புகளை அகற்றி நெடுஞ்சாலைத்துறையினர் இருக்கின்ற ரோட்டை அகலப்படுத்தி அமைத்தால் தான் போக்குவரத்திற்கு வசதியாக இருக்கும்.

அடிக்கடி அகற்ற வேண்டும் கிருஷ்ணன், தொழிலாளி: அருப்புக்கோட்டையில் ஆக்கிரமிப்புகளை அகற்றி பல ஆண்டுகள் ஆகிவிட்டது. ஆண்டிற்கு ஒரு முறையாவது அகற்ற வேண்டும்.நிரந்தர ஆக்கிரமிப்புகளையும் அகற்ற வேண்டும். ஆக்கிரமிப்புகள் செய்ய துவங்கும் முன்பே அதிகாரிகள் உடனடியாக அகற்றி ஆக்கிரமிப்பாளர்களுக்கு எச்சரிக்கை விடுக்க வேண்டும். ஆக்கிரமிப்பால் போக்குவரத்திற்கும் மக்களுக்கும் இடைஞ்சல் ஏற்படுவதுடன் பல மணி நேரம் காத் திருக்க வேண்டியுள்ளது.