மல்லாங்கிணர் அரசு மேல்நிலைப் பள்ளியில் 600க்கும் மேற்பட்ட மாணவர்கள் படிக்கின்றனர். பசுமை பள்ளி திட்டத்தில் தோட்டம் அமைத்து, மரக்கன்றுகள், குரோட்டன்ஸ், காய்கறி தோட்டம் ஏற்படுத்தப்பட்டன. மண்ணை பக்குவப்படுத்தி, வெண்டை, கத்தரி, மிளகாய், அவரை, புடலை, பூசணி, வெள்ளரி, கீரை செடிகள், மா, பலா உள்ளிட்ட மர வகைகள் நட்டு வளர்ந்துள்ளன. விளைந்த காய்கறிகளை அன்றாடம் பறித்து சத்துணவு மையத்திற்கு வழங்கப்படுகிறது.

சோலார் பொருத்தப்பட்டு பள்ளிக்கு மின்சாரம் பயன்படுத்தியது போக, மீதம் உள்ளது மின்வாரியத்திற்கு வழங்கப்படுகிறது. அரசுப் பள்ளியில் மாணவர்கள் பசுமை முயற்சி செய்து காய்கறிகளை விளைவித்து மரக்கன்றுகளை அக்கறையுடன் வளர்த்து வருவது அப்பகுதி மக்களிடையே ஆச்சரியத்தையும், ஆசிரியர்களிடத்தில் பெருமையையும் ஏற்படுத்தி இருப்பதை பாராட்டி வருகின்றனர்.

தர்ஷினி, மாணவி: எங்களாலும் பயிர் செய்ய முடியும் என்பதை பசுமை சூழல் உணர்த்தி உள்ளது. எங்கள் உழைப்பில் விளைந்த காய்கறிகளை சமைத்து சாப்பிடும் போது, எவ்வளவு மதிப்பு மிக்கது என்பது உணர முடிந்தது. செடி, கொடி, மரக்கன்றுகளை பராமரிக்கும் போது மன மகிழ்ச்சியாக இருப்பதால் உடல் ஆரோக்கியமாக இருப்பதை அறிய முடிகிறது. நம்மைச் சுற்றி பசுமையான சூழலை உருவாக்கினால் இயற்கை நமக்கு பாதுகாப்பான சூழ்நிலை தரும் என்பதில் சந்தேகமில்லை என்றார்.

சுதா, ஆசிரியை: பசுமை சூழலை உருவாக்கி, மாணவர்களுக்கு கற்றுத் தர துவக்கப்பட்டது. ஆர்வமுடன் பயிர் செய்து மரக்கன்றுகளை நட்டு வளர்த்து பராமரிப்பதில் மாணவர்கள் ஆர்வமுடன் ஈடுபட்டு வருகின்றனர். குரோட்டன் செடிகளை காண்பித்து பாடம் நடத்த பயனுள்ளதாக இருக்கிறது. மாணவர்களின் திறமையால், பள்ளிக்கு மட்டுமல்ல இப்பகுதிக்கும் பெருமையாக இருக்கிறது., என்றார்.