அன்புமணி அளித்த பேட்டி:

தி.மு.க., ஆட்சியை அகற்ற வேண்டும் என்ற நோக்கத்தில், கடந்த ஜூலை 25 முதல் நவ., 9 வரை நடைபயணம் மேற்கொண்டேன். விவசாயிகள், நெசவாளர்கள், பெண்கள் உட்பட பல்வேறு தரப்பினரை சந்தித்து, முக்கியமான 38 பிரச்னைகளை அடையாளம் கண்டுள்ளோம்.

பெரும்பாலான ஆறுகள் சாக்கடையாகி விட்டன. வட சென்னையில், குப்பை எரியுலை திட்டம் வாயிலாக மக்கள் கொல்லப்படுகின்றனர்.

ராணிப்பேட்டையில், குரோமிய கழிவுகளால் புற்றுநோய் அதிகரித்துஉள்ளது. கர்நாடக கழிவுகளால், ஓசூர் அருகே கெலவரப்பள்ளி அணையில் ரசாயன நுரையுடன் தண்ணீர் வருகிறது.

வீராணம் ஏரியை துார்வாருவது; பண்ருட்டியில் முந்திரி ஏற்றுமதி மண்டலம்; காவிரி குண்டாறு இணைப்பு; வைகை, தாமிரபரணி ஆறுகளில் கழிவுகள் கலப்பதை தடுப்பது உள்ளிட்ட கோரிக்கைகளை நிறைவேற்ற, பா.ம.க. தொடர்ந்து போராடும்.

மக்கள் தெரிவித்த இந்த பிரச்னைகளுக்கு, தி.மு.க., - அ.தி.மு.க., இரண்டு கட்சிகளுமே காரணம்.

சட்டசபை தேர்தலில், தி.மு.க.,வை தோற்கடிக்கும் வலிமையான கூட்டணியில் பா.ம.க., இடம்பெறும்.

யாருடன் கூட்டணி என்பதை விரைவில் அறிவிப்போம். பா.ம.க., உட்கட்சி பிரச்னைகள் குறித்து எதுவும் கூற விரும்பவில்லை.

அனைத்து குழப்பங்களும் இரண்டு மாதங்களில் முடிவுக்கு வரும். கூட்டணி ஆட்சி, ஆட்சியில் பங்கு என்பதையெல்லாம் தேர்தல் முடிவுகள்தான் தீர்மானிக்கும்.

இவ்வாறு அவர் கூறினார்.

இந்நிலையில், பா.ம.க., நிறுவனர் ராமதாஸ், பா.ம.க., தலைவர் அன்புமணி இடையே சமரசம் ஏற்படுத்த, மத்திய உள்துறை அமைச்சர் அமித் ஷா முடிவு எடுத்திருப்பதாகவும், அவர் விரைவில் தமிழகம் வந்து ராமதாசை சந்தித்து பேசுவார் என்றும் கூறப்படுகிறது.