பழநி முருகன் கோயில் திருக்கார்த்திகை தீப திருவிழா நவ. 27ல் காப்பு கட்டுதல் உடன் துவங்கியது. விழா நாட்களில் சண்முகார்ச்சனை ,சண்முகர் தீபாராதனை, சின்ன குமாரசுவாமி தங்கச் சப்பரத்தில் எழுந்தருளல், யாகசாலை தீபாராதனை நடைபெற்றது.

நேற்று (டிச.2 ) மாலை 5:30 மணிக்கு சாயரட்சை பூஜையில் புனிதநீர் நிரப்பிய கலசபூஜை நடக்க மூலவர் சன்னதியில் பரணி தீபம் ஏற்றப்பட்டது.

இன்று திருக்கார்த்திகை தீபத் திருநாளை முன்னிட்டு அதிகாலை 4:00 மணிக்கு விஸ்வரூப தரிசனம் விசேஷ பூஜைகளுடன் துவங்குகிறது. மதியம் 2:00 மணிக்கு சண்முக அர்ச்சனை, சண்முகர் தீபாராதனை நடக்கிறது. மதியம் 2:00 மணிக்கு குடமுழுக்கு அரங்க நுழைவாயில் தற்காலிகமாக அடைக்கப்படும். பக்தர்கள் அனுமதிக்கப்பட மாட்டார்கள்.

அதன்பின் மாலை 6:00 மணிக்கு சூழ்நிலைக்கேற்ப திறக்கப்பட்டு பக்தர்கள் கோயில் செல்ல அனுமதிக்கப்படுவர்.

மாலை 4:00 மணிக்கு சாயரட்சை பூஜை ,4:45 மணிக்கு சின்னகுமார சுவாமி தங்கமயில் வாகனத்தில் எழுந்தருள யாகசாலை தீபாராதனை நடைபெறுகிறது . அதன்பின் கோயில் நான்கு மூலைகளில் தீபம் ஏற்ற 6:00 மணிக்கு திருகார்த்திகை தீபம், சொக்கப்பனை ஏற்றுதல் நடைபெறுகிறது.

திருஆவினன்குடி, பெரியநாயகி அம்மன் கோயிலில் திருக்கார்த்திகை தீபம், சொக்கப்பனை ஏற்றுதல் நடக்கிறது.