சேலம் மாவட்டம், தளவாய்பட்டி கிராமத்தைச் சேர்ந்தவர் தினேஷ் குமார், 24; டிரைவர். இவருக்கு திருமணமாகி, 2 வயதில் மகன் உள்ளார்.

மேல்முறையீடு இவரது வீட்டுக்கு பூ பறிக்க வந்த வந்த, அதே பகுதியில் வசிக்கும் பட்டியலின சமூகத்தைச் சேர்ந்த, 12 வயது சிறுமிக்கு, தினேஷ் குமார் பாலியல் தொந்தரவு கொடுத்துள்ளார். இதுகுறித்து, சிறுமி தன் தாயிடம் தெரிவித்து உள்ளார்.

இதையறிந்து ஆத்திரமடைந்த தினேஷ் குமார், கடந்த 2018 அக்., 22ல் வீட்டின் முன் அமர்ந்திருந்த சிறுமியின் தலையை அரிவாளால் துண்டித்து, கொலை செய்துள்ளார்.

பின், சிறுமியின் தலையை, தளவாய்பட்டி -- ஈச்சம்பட்டி சாலையில் வீசி சென்றுள்ளார்.

இந்த சம்பவம் தொடர்பாக வழக்குப்பதிவு செய்த ஆத்துார் போலீசார், தினேஷ் குமாரை கைது செய்து சிறையில் அடைத்தனர்.

இந்த வழக்கை விசாரித்த சேலம் போக்சோ சிறப்பு நீதிமன்றம், தினேஷ் குமாருக்கு மரண தண்டனை விதித்து, கடந்த 2022ம் ஆண்டு ஏப்ரல் 26ல் தீர்ப்பளித்தது.

தண்டனையை உறுதி செய்ய, வழக்கு ஆவணங்கள் சென்னை உயர் நீதிமன்றத்துக்கு அனுப்பி வைக்கப்பட்டன.

குற்றவாளி தினேஷ் குமார் தரப்பில், தண்டனையை எதிர்த்து மேல் முறையீடு செய்யப்பட்டது .

இந்த வழக்கு, நீதிபதி என்.சதீஷ்குமார், எம்.ஜோதிராமன் அடங்கிய அமர்வு முன் விசாரணைக்கு வந்தது. அப்போது தினேஷ் குமார் தரப்பில், 'குற்றம் சாட்டப்பட்டவரை, சம்பவம் நடந்த இடத்துக்கு அருகில் வைத்து தான் போலீசார் கைது செய்துஉள்ளனர்.

'குற்றம் செய்த இரண்டு நாட்களுக்குப் பின்னும், அவர் அதே இடத்திலேயே தங்கி இருப்பது சாத்தியமற்றது. இது, அவர் மனநிலை சரியில்லை என்பதை காட்டுகிறது' என, வாதிடப்பட்டது.

காவல்துறை தரப்பில், 'குற்றம் சாட்டப்பட்டவர் மனநல பாதிப்புக்கு ஆளானவர் என்பதற்கு, மருத்துவ ரீதியாக ஆவணங்கள் இல்லை. எனவே, சட்டப்பூர்வமாக, மனநிலை சரியில்லை என்பதை நிரூபிக்க தவறி விட்டார்' என வாதிடப்பட்டது.

சான்றுகள் இல்லை இருதரப்பு வாதங்களை கேட்ட நீதிபதிகள் பிறப்பித்த உத்தரவு:

குற்றம் சாட்டப்பட்ட நபர் மனநிலை சரியில்லை எனக்கூறி, சட்டப்பூர்வ பாதுகாப்பை கோருவதற்கு, தகுந்த மருத்துவ சான்றுகள் இல்லை.

அவரது செயல் கொடூரமானது. சிறுமியின் உடலை இழுத்துச் சென்று, தலையை துண்டித்து சாலையில் வீசியுள்ளார்.இதை பார்க்கும்போது, குற்றம் சாட்டப்பட்டவரின் நடத்தை, ஒருவித வக்கிரத்தை வெளிப்படுத்துகிறது.

இருப்பினும், இவ்வழக்கு அரிதிலும் அரிதானது அல்ல. குற்றம் சாட்டப்பட்டவருக்கு எந்த குற்றப் பின்னணியும் இல்லை.

அவர் சீர்திருத்தத்திற்கு அப்பாற்பட்டவர் அல்ல என்பதையும் கருத்தில் கொண்டு, தினேஷ் குமாரின் மரண தண்டனை, ஆயுள் தண்டனையாக குறைக்கப்படுகிறது.

அதே நேரம், 20 ஆண்டுகளுக்கு, அவருக்கு எந்தவொரு தண்டனை குறைப்பும் வழங்கக் கூடாது.

இவ்வாறு உத்தரவில் கூறப்பட்டுள்ளது.