தமிழக காவல் துறையில் தற்போது பணியில் சேருபவர்கள் 'கிரேடு 2' போலீசாக கருதப்படுகின்றனர். பத்தாண்டுகளுக்கு பின் 'கிரேடு 1' பதவி உயர்வு பெறுவர். ஆனால் 1981ல் தேர்வு செய்யப்பட்ட பெண் போலீசார் 'கிரேடு 1' ஆக கருத வேண்டும் என அன்றைய முதல்வர் எம்.ஜி.ஆர்., அரசாணை வெளியிட்டார்.

இந்த அடிப்படையிலேயே 1986,1990, 1991ல் பெண் போலீசார் பணியில் சேர்க்கப்பட்டனர். இதற்கு பின் பணியில் சேர்ந்தவர்கள் 'கிரேடு 2' ஆக அழைக்க அரசு உத்தரவிட்டது. இதனால் 'கிரேடு 2' போலீசார் நீதிமன்றத்தை அணுகி, பெண்களை மட்டும் 'கிரேடு 1' ஆக தேர்ந்தெடுக்கப்பட்டு பயிற்சி முடித்த பின்பு நேரடியாக ஸ்டேஷன் பணிக்கு நியமிக்கப்டுவதாக வழக்கு தொடர்ந்தனர். இதன் காரணமாக 'கிரேடு 2' போலீசார் சிறப்பு பட்டாலியன், அடுத்து ஆயுதப்படைக்கு இடமாற்றப்பட்டனர். அந்த நடைமுறை இன்றும் தொடர்கிறது.

தேர்வு நிலை இறக்கம் இதன் காரணமாக 1991ல் கடைசியாக தேர்வான நேரடி 'கிரேடு 1' பெண் போலீசார் பேட்ச் இவர்கள்தான் என்று உறுதி யானது. பணி நியமன உத்தரவிலும் அவ்வாறே குறிப்பிடப்பட்டுள்ளது. இந்த பேட்ச்சில் தேர்வு செய்யப்பட்ட பெண் போலீசாருக்கு 2003ல் ஏட்டாக பதவி உயர்வு அளிக்கப்பட்டது.

2009ல் சிறப்பு எஸ்.ஐ.,யாக பதவி உயர்வு பெற்றனர். நிர்வாக காரணங்களால் 2016ல் கால தாமதமாக இவர்கள் எஸ்.ஐ., பயிற்சி அனுப்பப்பட்டனர். இதன்அடிப்படையில் 'சீனியாரிட்டி' நிர்ணயிக்கப்பட்டது. அதுவும் ஒவ்வொரு மாவட்டத்திற்கும் வெவ்வேறு தேதி, மாதம் இருந்ததால் இன்ஸ் பெக்டராக பதவி உயர்வு பெறுவதில் காலதாமதமாகி வருகிறது. இதில் பலர் ஓய்வு பெற்றுவிட்டனர். சிலர் விருப்ப ஓய்வு முடிவில் இருக்கின்றனர்.

எஞ்சியுள்ள நுாற்றுக்கும் மேற்பட்டோரில் குறிப்பாக மதுரை நகரில் பணியாற்றுவோருக்கு நீதிமன்ற உத்தரவை காரணம்காட்டி 'சம்பள சீரமைப்பு' என்று கமிஷனர் உத்தரவிட்டு உள்ளதால் 1991 பேட்ச் பெண் எஸ்.ஐ.,க்கள் அதிர்ச்சி அடைந்துள்ளனர். தங்களது 35 ஆண்டு கால கனவு தகர்ந்ததாக புலம்புகின்றனர்.

அவர்களில் சிலர் கூறியதாவது:

நியாயமான முறையில் முன் தேதியிட்டு பதவி உயர்வு பட்டியல் தயார் செய்தும், நீதிமன்றத்தில் அரசும், உயர்அதிகாரிகளும் நியாயத்தை எடுத்து சொல்லவில்லை. நேரடி 'கிரேடு 1' போலீசாக சேர்ந்தும் உரிய நேரத்தில் பதவி உயர்வு கொடுக்காமல் தாமதமாக எஸ்.ஐ., பயிற்சிக்கு அனுப்பியது அரசின் தவறு.

35 ஆண்டுகள் குடும்பத்தையும், குழந்தை களையும் சரிவர கவனிக்காமலும் பணி செய்தும் தற்போது 'கிரேடு 1' அங்கீகாரம் பறிக்கப்பட்டது மனஉளைச்சலை ஏற் படுத்தியுள்ளது.

இன்ஸ்பெக்டர் பதவி உயர்வு பட்டியல் தயார் செய்ததில் எங்கள் பேட்சை சேர்ந்த 50 பேர், பதவி உயர்வு பட்டியலில் இருந்தார்கள். ஆனால் நிர்வாக ரீதியாக சிலர் 'விளையாடியதாலும்' கவர்னர் ஆட்சியில் நாங்கள் பயிற்சிக்கு சென்றோம் என்ற காரணத்தினாலும் எங்களது வாய்ப்பு பறிக்கப்பட்டுள்ளது.

'கிரேடு 1' அடிப்படையிலேயே எங்கள் சர்வீஸ் கருதப்பட்டு பதவி உயர்வு அளிக்க வேண்டும். எங்களின் மனக்குமுறலுக்கு முதல்வர் ஸ்டாலின் தீர்வு காண வேண்டும். இவ்வாறு கூறினர்.