திருப்பூரில் நேற்று நடந்த தே.மு.தி.க. பூத் முகவர்கள் ஆலோசனை கூட்டத்தில், பொதுச்செயலாளர் பிரேமலதா பேசியதாவது:எத்தனை தடைகள் முன்நின்றாலும், பீனிக்ஸ் பறவை போல் தே.மு.தி.க. பயணித்துக் கொண்டே இருக்கிறது. தொண்டர்கள் விரும்பும் கூட்டணி தான் அமையும். நாம் இடம் பெறும் கூட்டணி தான் ஆட்சி அமைக்கும். தமிழக அரசியலில் இதுவரை பார்க்காத அதிசயம், 2026ல் நடக்கும்.

கூட்டணி மந்திரிசபை தான் அமையும்; அதில் நாம் இருப்போம். இருபது ஆண்டுகளாக உழைத்து கொண்டு இருக்கிறோம். இதுவரை உழைத்த உங்களை அரசுப் பதவியில் உட்கார வைக்கும் தேர்தலாக இது இருக்கும். அனைவருக்கும் அங்கீகாரம் தரும் வகையிலான கூட்டணி உருவாகும். வரும் டிச. 28ல் விஜயகாந்த் குருபூஜையும், ஜன. 9ல் கடலுாரில் மக்கள் உரிமை மீட்பு மாநாடும் நடைபெறும்.இவ்வாறு பிரேமலதா பேசினார்.கூட்டத்துக்கு பின் நிருபர்களை சந்தித்த பிரேமலதா, 'அனைவரின் வீட்டுக்கே சென்று ரேஷன் அரிசி வழங்கும் திட்டம் வேண்டும் என விஜயகாந்த் வலியுறுத்தினார்.

தமிழக அரசு முதியோர், மாற்றுத்திறனாளிகளுக்கு தரமில்லாத ரேஷன் அரிசியை வழங்குகிறது,' என குற்றம்சாட்டினர். அப்போது தொண்டர் ஒருவர் கொண்டு வந்திருந்த ரேஷன் அரிசியை வாங்கி,'இந்த அரிசி எப்படி இருக்கிறது; நீங்களே பாருங்கள்,' என காட்டினார்.