திருநெல்வேலி நெல்லையப்பர் கோவிலில் இருந்த, 55 வயதான பெண் யானை காந்திமதி, கடந்த ஜன., 12ல் உடல்நலக்குறைவால் இறந்தது.

இதையடுத்து, இந்த கோவிலுக்கு, உத்தரகண்ட் மாநிலத்தில் இருந்து, 5 வயது குட்டி யானையை கொண்டு வர, அறநிலையத்துறை மற்றும் வனத்துறை நடவடிக்கை எடுத்துள்ளது. இதை எதிர்த்து, சென்னை தி.நகரைச் சேர்ந்த தன்னார்வ தொண்டு நிறுவனம் வழக்கு தொடர்ந்தது.

மனுவில், 'உத்தரகண்ட் வனத்துறை சரணாலயத்தில் பராமரிக்கப்படும் குட்டி யானையை, தாயிடம் இருந்தும், அதன் கூட்டத்தில் இருந்தும் பிரித்து கொண்டு வரப்பட உள்ளதால், அதற்கு தடை விதிக்க வேண்டும்' என, குறிப்பிடப்பட்டிருந்தது.

இந்த மனு, தலைமை நீதிபதி எம்.எம்.ஸ்ரீவஸ்தவா, நீதிபதி ஜி.அருள்முருகன் அடங்கிய அமர்வு முன், விசாரணைக்கு வந்தது.

அப்போது, தமிழக அரசின் அட்வகேட் ஜெனரல் பி.எஸ்.ராமன், அறநிலையத்துறை தரப்பில் சிறப்பு பிளீடர் அருண் நடராஜன் ஆகியோர் ஆஜராகி, ''தமிழகத்துக்கு யானை அனுப்பி வைப்பது தொடர்பாக, உத்தரகண்ட் அரசு சார்பில், இதுவரை எந்த உத்தரவும் பிறப்பிக்கவில்லை,'' என்றனர்.

இதை ஏற்ற நீதிபதிகள், மனுவை தள்ளுபடி செய்து உத்தரவிட்டனர்.