கரூரில், செப்., 27ல் விஜய் பிரசாரத்தின் போது ஏற்பட்ட கூட்ட நெரிசலில் சிக்கி, 41 பேர் பலியாகினர்.

இதையடுத்து, பொது மக்களின் பாதுகாப்பை உறுதி செய்யவும், ஏராளமானோர் கூடுவதை கட்டுப்படுத்தவும், அரசியல் கட்சிகளின், 'ரோடு ஷோ' மற்றும் பொதுக்கூட்டங்களுக்கு, எஸ்.ஓ.பி., என்ற நிலையான வழிகாட்டி விதிமுறைகளை வகுக்க கோரி, துாத்துக்குடியை சேர்ந்த திருக்குமரன், தேசிய மக்கள் சக்தி கட்சி மற்றும் த.வெ.க., தரப்பில் மனுக்கள் தாக்கல் செய்யப்பட்டன.

இந்த வழக்குகள், கடந்த முறை விசாரணைக்கு வந்த போது, வரைவு வழிகாட்டி விதிமுறைகள், தமிழக அரசால் தாக்கல் செய்யப்பட்டன.

அதன் மீது, தங்களது பரிந்துரைகளை வழங்கும்படி, அ.தி.மு.க., - த.வெ.க., மற்றும் தேசிய மக்கள் சக்தி கட்சி தரப்புக்கு நீதிபதிகள் உத்தரவிட்டிருந்தனர்.

இந்நிலையில், இந்த வழக்குகள், தலைமை நீதிபதி எம்.எம்.ஸ்ரீவஸ்தவா, நீதிபதி ஜி.அருள்முருகன் அடங்கிய அமர்வு முன் நேற்று மீண்டும் விசாரணைக்கு வந்தன.

அப்போது, த.வெ.க., மற்றும் தேசிய மக்கள் சக்தி கட்சி சார்பில் ஆஜரான வழக்கறிஞர்கள், தங்கள் கட்சிகள் தரப்பின் பரிந்துரைகளை தாக்கல் செய்தனர்.

அதற்கு அரசு தரப்பில், 'பரிந்துரைகள் பரிசீலிக்கப்படும்' என்று தெரிவிக்கப்பட்டது. இதையடுத்து, இந்த மனுக்கள் மீதான உத்தரவை, தேதி குறிப்பிடாமல் நீதிபதிகள் தள்ளிவைத்தனர்.