வங்கக் கடலில் உருவாகியுள்ள டித்வா புயல் காரணமாக , மயிலாடுதுறை மாவட்டத்துக்கு ரெட் அலர்ட் விடுக்கப்பட்டது. இரண்டு நாட்களாக மிதமான மழை பெய்த நிலையில் சனி மதியம் முதல் கனமழை வெளுத்து வாங்கியது.

கடலோரப் பகுதிகளில் பலத்த காற்றும், உள் பகுதிகளில் மிதமான காற்றும் தொடர்ந்து வீசி வருகிறது. கடலில் 8 அடி உயரம் வரை அலைகள் எழுந்து கடல் மிகுந்த சீற்றத்துடன் காணப்பட்டது.

இதனால் மாவட்டத்தில் உள்ள 28 மீனவ கிராமங்களை சேர்ந்த மீனவர்கள் கடலுக்கு மீன்பிடிக்க செல்லவில்லை. மீன்பிடி துறைமுகங்கள், கடற்கரையோர ஆறுகளில் மீனவர்கள் படகுகளை பாதுகாப்பாக நிறுத்தி வைத்திருந்தனர்.

கடலோர கிராமங்களிலும், தாழ்வான பகுதிகளிலும், குறுகலான சாலைகளிலும், விளை நிலங்களிலும் நீர் தேங்கியது.

மாவட்ட முழுவதும் விவசாயிகள் 67,993 ஹெக்டரில் சம்பா தாளடி நெற்பயிற் சாகுபடி செய்திருந்த நிலையில் தற்போது இடைவிடாது பெய்து வரும் மழைநீர் வடிவதில் சிக்கல் ஏற்பட்டு 9 ஆயிரம் ஹெக்டரில் இளம் நெற்பயிர்கள் நீரில் மூழ்கியுள்ளன. மழை தொடர்ந்து பெய்து வருவதால் மாவட்டம் முழுவதிலும் சம்பா தாளடி நெற் பயிர்கள் நீரில் மூழ்கி அழுகும் அபாயம் ஏற்பட்டுள்ளதாக விவசாயிகள் வேதனை தெரிவிக்கின்றனர்.

தொடர்ந்து காற்று மற்றும் மழையின் வேகம் அதிகரித்து வரும் நிலையில் வயலில் தேங்கும் தண்ணீரை அவ்வப்போது வடிய வைத்து நெற்பயிர்களுடன், வாழை மற்றும் கரும்பு பயிர்களை பாதுகாக்கும் பணியில் விவசாயிகள் ஈடுபட்டுள்ளனர்.

முன்னெச்சரிக்கை மற்றும் மீட்பு நடவடிக்கைகளை மேற்கொள்வதற்காக தலா 31 பேர் கொண்ட தமிழ்நாடு பேரிடர் மீட்பு படையினர் சீர்காழியிலும், தேசிய பேரிடர் மீட்பு படையினர் தரங்கம்பாடியிலும் 2 நாட்களாக முகாமிட்டுள்ளனர். மீட்பு நடவடிக்கைக்காக மயிலாடுதுறை மாவட்ட காவல் துறை சார்பில் மயிலாடுதுறை, சீர்காழி கோட்டங்களில் தலா 30 நீச்சல் வீரர்கள் கொண்ட 2 குழுக்கள் மற்றும் 10 பேர் கொண்ட பாம்பு பிடி வீரர்கள் தயார் நிலையில் வைக்கப்பட்டுள்ளனர். மயிலாடுதுறையில் மாவட்ட எஸ்.பி ஸ்டாலின், இக்குழுவினரை சந்தித்து உரிய அறிவுறுத்தல்களை வழங்கினார்.

மாவட்ட நீர்வளத்துறை கண்காணிப்பு அலுவலர் சந்திரகலா தலைமையில் அலுவலர்கள் மாவட்டம் முழுவதிலும் கண்காணிப்பு பணியில் ஈடுபட்டு, நீர் நிலைகளில் உள்ள ஆகய தாமரை செடிகளை அகற்றியும், பொக்லைன் இயந்திரம் மூலம் மழை நீரை வடியச் செய்வதற்கான பணிகளை மேற்கொண்டனர்.

மயிலாடுதுறை மாவட்டத்தில் இன்று(நவம்பர் 29) மாலை 4.30 மணியுடன் பதிவான மழையளவு (மி.மீட்டரில்): மயிலாடுதுறை 84.80, மணல்மேடு 49, சீர்காழி 84.60, கொள்ளிடம் 57.60, தரங்கம்பாடி 61.01, செம்பனார்கோவில் 119.70.