பிரதீப் ரங்கநாதன் நடிப்பில், டியூட் படம் வெளியானது. இந்த படத்தில் தன் அனுமதியின்றி, 'கருத்த மச்சான், நுாறு வருஷம்' ஆகிய இரண்டு பாடல்கள் பயன்படுத்தப்பட்டு உள்ளதால், அவற்றை நீக்க உத்தரவிட வேண்டும் என, இளையராஜா வழக்கு தொடர்ந்தார்.

இந்த வழக்கை விசாரித்த நீதிபதி என்.செந்தில்குமார் பிறப்பித்த உத்தரவு:

மனுதாரர் இசையமைத்த பாடல்களை உருமாற்றி, பயன்படுத்தி உள்ளதற்கு முகாந்திரம் உள்ளது. அவரது பாடல்களின் புனிதத்துக்கும், அவரது நற்பெயருக்கும் பாதிப்பு ஏற்படுத்தும் வகையில் அனுமதியின்றி பயன்படுத்தப்பட்டு உள்ளது.

எனவே, டியூட் படத்தில் இடம்பெற்ற இளையராஜாவின் இரண்டு பாடல்களை பயன்படுத்த இடைக்கால தடை விதிக்கிறேன். இந்த மனுவுக்கு, பட தயாரிப்பு நிறுவனம் ஜன., 7ம் தேதிக்குள் பதிலளிக்க வேண்டும்.

இவ்வாறு அதில் கூறப்பட்டுள்ளது.

அப்போது, 'இந்த உத்தரவை அமல்படுத்தும் வகையில், படத்தில் இடம்பெற்றுள்ள பாடல்களை நீக்க ஏதுவாக, ஒரு வார அவகாசம் வழங்க வேண்டும்' என, பட தயாரிப்பு நிறுவனம் விடுத்த கோரிக்கையை, நீதிபதி ஏற்க மறுத்தார்.