சென்னை மாவட்ட சமூக நலத்துறை சார்பில், திருநங்கையருக்கு திறன் பயிற்சிகள் வழங்கப்பட்டன. பயிற்சி முடித்தவர்களுக்கு சான்றிதழ் மற்றும் 50,000 ரூபாய் மானியத்தை, மக்கள் நல்வாழ்வு துறை அமைச்சர் சுப்பிரமணியன் வழங்கினார்.

அப்போது, அவர் அளித்த பேட்டி:

சென்னையில் திருநங்கையர், ஒரு லட்சம் ரூபாய் மானியத்துடன் ஆட்டோ பெற விரும்பினால், எங்களை அணுகலாம். நாங்கள், 'பேட்ச்' ஓட்டுநர் உரிமம் இலவசமாக பெற்று தந்து, அவர்களுக்கு ஆட்டோக்கள் பெற்றுத்தர தயாராக உள்ளோம்.

'டிட்வா' புயல் முன்னெச்சரிக்கை நடவடிக்கையாக, அனைத்து மருத்துவமனைகளிலும், டாக்டர்கள் முழுநேர பணியில் இருக்க வேண்டும்.

காய்ச்சல் பாதிப்பு உள்ள பகுதியில், மழைக்கால சிறப்பு மருத்துவ முகாம்கள் நடத்த வேண்டும் என, அறிவுறுத்தப்பட்டுள்ளது. அனைத்து மருத்துவமனைகளிலும் முழு நேரமும் மின்சாரம் தடைபடாமல் இருக்க, நடவடிக்கை எடுக்கப்பட்டுள்ளது.

ஒரு மாதத்துக்கு முன், மருத்துவ பேராசிரியர் பதவி உயர்வு தொடர்பான கோப்பு தயார் செய்யப்பட்டுள்ளது. நிதித்துறை ஒப்புதல் பெற்றதும், ஓரிரு நாட்களில், கையெழுத்து பெற்று திரும்ப வந்துவிடும்.

இது, ஒரு சாதாரண நடைமுறை. அதற்குள், பா.ம.க., தலைவர் அன்புமணி அறிக்கை வெளியிடுவது விநோதமாக இருக்கிறது. தமிழக மருத்துவ துறையில் காலிப்பணியிடங்களே இல்லை என்ற நிலை எட்டப்பட்டுள்ளது. ஓய்வு பெறும் டாக்டர்கள் பணியிடத்தையும் நிரப்ப நடவடிக்கை எடுக்கப்பட்டுள்ளது.

இவ்வாறு அமைச்சர் கூறினார்.