நாடு முழுதும், காங்கிரஸ் கட்சியின் கட்டமைப்பை பலப்படுத்தும் நோக்கில், சிறப்பாக பணியாற்றக் கூடியவர்களை மாவட்ட தலைவர்களாக நியமிக்க, 'சங்கதன் ஸ்ரீஜன் அபியான்' என்ற திட்டத்தை அக்கட்சி துவக்கியுள்ளது.

அதன்படி, ஒவ்வொரு மாநிலத்திலும் மாவட்டத் தலைவர்கள் நியமனம் நடந்து வருகிறது.

பிரத்யேக படிவம்

இதற்காக, ஒவ்வொரு மாநிலத்திற்கும், டில்லியில் இருந்து கட்சியின் தேர்தல் பார்வையாளர்கள் அனுப்பி வைக்கப்பட்டுள்ளனர்.

தமிழக காங்கிரசில், 77 மாவட்டங்களில், கோவையில் மட்டும் மூன்று மாவட்டத் தலைவர்கள் தேர்வு செய்யப்பட்டுள்ளனர். மீதம் 74 மாவட்டத் தலைவர்களை தேர்வு செய்ய, டில்லியில் இருந்து, 38 பார்வையாளர்கள் வந்துள்ளனர்.

மாவட்ட தலைவர் பதவிக்கான தேர்வு நேர்காணலில், பிரத்யேக படிவம் வழங்கப்பட்டு வருகிறது. இந்த படிவத்தை, தேவையான ஆவணங்களுடன் ஆங்கிலத்தில் பூர்த்தி செய்து வழங்குவோரில், தகுதியான நபர்கள் அந்த பதவிக்கு தேர்வு செய்யப்படுகின்றனர்.

இந்நிலையில், மாவட்டத் தலைவர்கள் தேர்வு நடத்தும் மேலிட பார்வையாளர்களை சந்திக்கும் தமிழக காங்கிரசார், 'வரும் சட்டசபை தேர்தலில், தி.மு.க., கூட்டணியில் நீடிக்க வேண்டும் என்றால், ஆட்சியில் பங்கு கேட்க வேண்டும். கூடுதல் தொகுதிகளில் போட்டியிட வேண்டும்.

வாய்ப்பு கனிந்துள்ளது

'இதற்கு தி.மு.க., சம்மதிக்கவில்லை என்றால், நடிகர் விஜய் தலைமையிலான த.வெ.க.,வுடன் கூட்டணி அமைக்கலாம். தமிழகத்தில் ஆட்சி அதிகாரத்தில் காங்கிரஸ் இடம்பெறுவதற்கான வாய்ப்பு கனிந்துள்ளது; இதை பயன்படுத்திக் கொள்ள வேண்டும்' என வலியுறுத்தி வருகின்றனர்.

இதனால், மேலிட பார்வையாளர்கள் அதிர்ச்சி அடைந்துள்ளனர். அவர்கள், 'நாங்கள் மாவட்டத் தலைவர் பதவிக்கு தேர்வு செய்யத்தான் வந்துள்ளோம். கூட்டணி குறித்த கருத்துகளை எங்களிடம் கூற வேண்டாம்' என, சமாளித்து வருகின்றனர்.

- நமது நிருபர் -