மயிலாடுதுறை மாவட்டம், குத்தாலத்தில் உள்ள ஆதிகேசவ பெருமாள் கோவில் பக்தர் டாக்டர் டி.செல்வராஜ் தாக்கல் செய்த மனு:

ஆதிகேசவ பெருமாள் கோவிலுக்கு, அலமேலு அம்மாள் என்பவர், திருவேள்விக்குடி கிராமத்தில் தனக்கு சொந்தமாக இருந்த நிலத்தை 1957ல் தானமாக கொடுத்துள்ளார்.

அந்த நிலத்தை, பி. கல்யாணம், பி.கோவிந்தராஜன் ஆகியோர், போலியான ஆவணங்கள் வாயிலாக விற்பனை பத்திரம் தயாரித்து அபகரித்துள்ளனர்.

எனவே, தானமாக வழங்கப்பட்ட நிலத்தை, மோசடி ஆவணங்கள் வாயிலாக பத்திரப்பதிவு செய்யப்பட்டது குறித்து விசாரணை நடத்தி, அவற்றை ரத்து செய்யக் கோரி, நிர்வாக பணிகளுக்கான மாவட்ட பதிவாளரிடம், கடந்த ஆக., 4ம் தேதி புகார் மனு அளிக்கப் பட்டது. இதுவரை நடவடிக்கை எடுக்கவில்லை. எனவே, அந்த மனுவை பரிசீலித்து, தகுந்த நடவடிக்கை எடுக்க வேண்டும்.

இவ்வாறு அதில் கூறப்பட்டுள்ளது.

இந்த மனு, நீதிபதி கிருஷ்ணன் ராமசாமி முன் விசாரணைக்கு வந்தது.

மனுதாரர் தரப்பில், வழக்கறிஞர் யு.கதிரவன் ஆஜராகி, ''தானமாக வழங்கப்பட்ட நிலத்தை, போலி ஆவணங்கள் வாயிலாக அபகரிக்க உதவி செய்து தவறிழைத்த அதிகாரிகளுக்கு எதிராகவும், நடவடிக்கை எடுக்க உத்தரவிட வேண்டும்,'' என்றார்.

அரசு தரப்பில், 'மனுதாரரின் புகார் மனு பரிசீலிக்கப்படும்' என தெரிவிக்கப்பட்டது.

இதை பதிவு செய்த நீதிபதி, 'மனுதாரரின் புகார் மனுவை பரிசீலித்து, சட்டத்துக்கு உட்பட்டு, நான்கு வாரத்துக்குள் உரிய உத்தரவை பிறப்பிக்க வேண்டும்' என, நிர்வாகப் பணிகளுக்கான மாவட்ட பதிவாளருக்கு உத்தரவிட்டு, மனுவை முடித்து வைத்தார்.