இது குறித்து, தி.மு.க., வட்டாரங்கள் கூறியதாவது:

தி.மு.க., இளைஞரணி செயலரும், துணை முதல்வருமான உதயநிதியின், 49வது பிறந்த நாள் விழா நேற்று முன்தினம் கொண்டாடப்பட்டது.

சென்னையில், உதயநிதியின் இல்லத்தில் நடந்த கெடுபிடி மற்றும் இளைஞரணி நிர்வாகிகளின் ஆதிக்கம், கட்சியின் மூத்த நிர்வாகிகளை அதிருப்தியடைய செய்துள்ளது.

அன்று காலை, முதல்வர் ஸ்டாலினை சந்தித்து வாழ்த்து பெற்ற உதயநிதி, தனது குறிஞ்சி இல்லத்திற்கு வந்தார். வீட்டின் உள்ளே அமைக்கப்பட்ட சிறிய மேடைக்கு உதயநிதி வந்ததும், காத்திருந்த அமைச்சர்கள், எம்.எல்.ஏ.,க்கள், எம்.பி.,க்கள், மாவட்டச் செயலர்கள் வரிசையாக வந்து வாழ்த்து தெரிவித்தனர்.

காலை 10:00 மணிக்கு துவங்கிய இந்நிகழ்வு, மாலை 4:00 மணி வரை நீடித்தது; 20,000 பேர் வாழ்த்து தெரிவித்தனர். போலீசாரின் சோதனைக்கு பின்னரே, நிர்வாகிகள், தொண்டர்கள் அனுமதிக்கப்பட்டனர்.

அப்போது, தி.மு.க., மாநில நிர்வாகியும், தற்போதைய மூத்த எம்.பி.,யுமான ஒருவரின் காரை, இளைஞரணியினரும், போலீசாரும் அனுமதிக்கவில்லை. உதயநிதியை சந்தித்து வாழ்த்து சொல்ல, அவர் 15 நிமிடங்கள் வரை அலைக்கழிக்கப்பட்டார்.

இதுபோல, சிவில் உடையில் இருந்த போலீசார், தி.மு.க., நிர்வாகிகள், எம்.எல்.ஏ., மாவட்டச் செயலர் எனக் கூட பார்க்காமல், சிலரின் கையை பிடித்து இழுத்து தள்ளிய சம்பவமும் அரங்கேறியது. மேடையில் உதயநிதியுடன், 'செல்பி' எடுக்கக் கூட அனுமதிக்கவில்லை.

உதயநிதியை சந்தித்த போட்டோக்கள், கட்சி நிர்வாகிகளுக்கு அனுப்பி வைக்கப்படவில்லை. இதனால், அவர்கள் வாட்ஸாப் மற்றும் முகநுாலில், உதயநிதியுடன் இருக்கும் படத்தை வைக்கும் எண்ணம் நிறைவேறாமல், ஏமாற்றமடைந்தனர். இவ்வாறு அவ் வட்டாரங்கள் தெரிவித்தன.

- நமது நிருபர் -