அதிபர் டிரம்ப் குறிப்பிட்டுள்ள மூன்றாம் உலக நாடுகள் என்ற சொல்லாடல், பனிப்போர் காலத்தில் உருவானதாக கூறப்படுகிறது. அமெரிக்காவுடன் அணி சேர்ந்த மேற்கத்திய கூட்டமைப்பு மற்றும் கம்யூனிச கிழக்கு கூட்டமைப்பு என பிரிக்கப்பட்ட போது, உலகத்தை முதல் உலகம், இரண்டாம் உலகம், மூன்றாம் உலகம் என பிரிக்கப்பட்டது. முதல் உலக நாடு : வரலாற்று ரீதியாக, அமெரிக்காவுடன் அணி சேர்ந்த ஜனநாயக, தொழில் மயமான நாடுகளை இது குறிக்கிறது. வட அமெரிக்கா, மேற்கு ஐரோப்பா, ஜப்பான், தென் கொரியா மற்றும் ஆஸ்திரேலியா ஆகியவை இதில் அடங்கும். போர்ச்சுக்கீசிய ஆட்சியின் கீழ் இருந்த அங்கோலா மற்றும் மொசாம்பிக் ஆகியவையும், கடந்த 1975க்கு பின் கம்யூனிச நாடாக மாறும் வரை இப்பிரிவில் இருந்தன. சுவிட்சர்லாந்து, ஸ்வீடன், ஆஸ்திரியா, அயர்லாந்து மற்றும் பின்லாந்து போன்ற நாடுகளும் கூட நடைமுறையில் முதல் உலக நாடுகளாகவே கருதப்பட்டன. இரண்டாம் உலக நாடு: தொழிலாளர்கள் மற்றும் விவசாயிகளால் தலைமை தாங்கப்பட்ட கம்யூனிஸ்ட் - சோஷலிச நாடுகளை இது குறிக்கிறது. இதில், சோவியத் குடியரசு மற்றும் போலந்து, கிழக்கு ஜெர்மனி, செக்கோஸ்லோவாக்கியா மற்றும் பால்கன் நாடுகள் போன்ற கிழக்கு ஐரோப்பிய நாடுகள் அடங்கும். சீனாவுடன் தொடர்புடைய ஆசிய கம்யூனிச நாடுகளான மங்கோலியா, வடகொரியா, வியட்நாம், லாவோஸ் மற்றும் கம்போடியா ஆகியவையும் இப்பிரிவில் உள்ளன. மூன்றாம் உலக நாடு : அமெரிக்கா மற்றும் சோவியத் நாடுகள் தலைமையிலான எந்த கூட்டமைப்பிலும் சேராத நாடுகள் இந்த பிரிவில் உள்ளன. இவை பெரும்பாலும் ஆப்ரிக்கா, ஆசியா மற்றும் லத்தீன் அமெரிக்கா முழுதும் உள்ள வளர்ச்சியடையாத விவசாய நாடுகளாக இருந்தன.

வெள்ளை மாளிகை அருகே தேசிய காவல் படை வீரர்கள் மீது துப்பாக்கிச் சூடு நடத்திய ஆப்கானிஸ்தானை சேர்ந்த ரஹ்மானுல்லா லக்கன்வால், 29, என்ற இளைஞர், அமெரிக்காவின் சி.ஐ.ஏ., ஆதரவு படையான, ஜீரோ யூனிட்டில் பணியாற்றியவர் என்பது தெரிய வந்துள்ளது. ஆப்கனில் அமெரிக்க அமைதிப்படை பாதுகாப்பில் ஈடுபட்ட போது, சி.ஐ.ஏ.,வின் துணை படைப்பிரிவு ஒன்றில் லக்கன்வால் பணியாற்றி உள்ளார். 2021 ஆகஸ்டில் அமெரிக்க படைகள் ஆப்கனில் இருந்து திரும்பின. தொடர்ந்து, ஏற்கனவே அமெரிக்க படைகளுடன் இணைந்து பணியாற்றிய ஆவணங்களை வைத்து, முன்னாள் அதிபர் ஜோ பைடன் நிர்வாகத்தால் ஆப்கானியர்களுக்காக துவங்கப்பட்ட மறு குடியேற்ற திட்டத்தின் வாயிலாக, 2021 செப்டம்பரில் லக்கன்வால் அமெரிக்காவிற்கு சென்றார். இதே ஆவணங்களை வைத்து டிரம்ப் நிர்வாகத்திலும் அவர் குடியுரிமை பெற்றார். துப்பாக்கிச் சூடு நடத்த வாஷிங்டன் மாகாணத்தில் உள்ள பெல்லிங்ஹாமில் இருந்து வாஷிங்டன் டி.சி., வரை, 2,500 கி.மீ., காரில் பயணித்தே லக்கன்வால் வந்ததாக கூறப்படுகிறது.