'திராவிட இயக்கங்கள் பிறப்புக்குப் பின், தமிழகத்தில் அரசியல் நாகரிகம் இல்லாமல் போய்விட்டது' என, தாய் கழகமான திராவிடர் கழகம் வருத்தப்பட்டு உள்ளது.
தமிழகத்தை, அரை நூற்றாண்டாக, தி.மு.க.,வும் - அ.தி.மு.க.,வும் மாறி மாறி ஆட்சி செய்து வருகின்றன. இரு கட்சியினரும், ஒருவர், மற்றொருவரின் சுக, துக்கங்களில் கூட பங்கு கொள்ளாத அளவுக்கு, எதிரும் புதிருமாக நிற்கின்றனர்.
பரிந்துரை: ஆனால், வட மாநிலங்களில் இந்நிலை இல்லை. நேர் - எதிர் அரசியல் எதிரியாக இருந்தாலும், அவர்கள் வீட்டில் நடக்கும் சுக, துக்கங்களில் பங்கேற்கும் பண்பு உள்ளவர்களாக இருக்கின்றனர். பா.ஜ.,வை கடுமையாக சாடி வரும், முலாயம் சிங் யாதவின் இல்லத் திருமணத்தில், பிரதமர் மோடி பங்கேற்றுள்ளார். ஆஸ்துமாவுக்கு சிகிச்சை பெற, தான் சிகிச்சை பெறும் மருத்துவரை, டில்லி முதல்வர் கெஜ்ரிவாலுக்கு, மோடி பரிந்துரைத்து உள்ளார். இதுபோன்ற நாகரிகம், தமிழகத்தில் இல்லை. எதிர்க்கட்சியினரை, நேரில் சந்திப்பதைக் கூட தவிர்க்கின்றனர். திராவிட இயக்கத்தின் பிறப்புக்குப் பின், இந்த நிலை என்பது கசப்பான உண்மை என, திராவிடர் கழகம் கூறியுள்ளது.
இதுகுறித்து, தமிழக அரசியல் கட்சியினர் கருத்து:
அ.தி.மு.க., தலைமை கழக பேச்சாளர் ஆவடி குமார்: மனதுக்குள் ஒன்றை வைத்து, மற்றவர்களுக்காக நாடகம் போடுவது
போலியான கலாசாரம். எதிரி வீட்டு சுக, துக்கங்களில் பங்கேற்று விட்டு, அவரது
காலைவாரி விடுவதும் சரியல்ல. அதனால், மனதுக்குள் என்ன உள்ளதோ, அதை நேர்மையாக வெளிப்படுத்துகின்றனர்;
இதில் தவறில்லை. பாசாங்கு செய்யத் தேவையில்லை. எதிரி என்றால், அரசியலில்
மட்டுமல்ல; அனைத்திலும் என முடிவெடுத்து தான், எதிரி வீட்டு சுக,
துக்கங்களையும் தவிர்க்கின்றனர். முலாயம் வீட்டு திருமணத்துக்கு மோடி
சென்றார் என்றால், ராஜ்யசபாவில், பா.ஜ.,வுக்கு மெஜாரிட்டி இல்லை. அதற்கு,
தாஜா செய்ய வேண்டிய நிர்பந்தம் மோடிக்கு இருக்கிறது. அதற்காக, அவர்
சென்றிருக்கக் கூடும்; மேலோட்டமாக பார்த்து, எதையும் தீர்மானிக்க முடியாது.
தி.மு.க., - எம்.பி., கே.பி. ராமலிங்கம்: 'தமிழகத்தில், அரசியல் நாகரிகம் இல்லை; இதற்கு, திராவிட இயக்கங்கள் காரணம்' என, பொதுவாக சொல்லக் கூடாது. யார் காரணம் என்பதை, திராவிடர் கழகம் தெளிவாகச் சொல்ல வேண்டும். தி.மு.க., தலைவர் கருணாநிதி, அ.தி.மு.க., முன்னாள் பொதுச் செயலர் எம்.ஜி.ஆர்., ஆகியோர், அரசியல் எதிரிகளாக இருந்தாலும், அரசியல் நாகரிகத்தை கடைபிடித்தனர். மாற்றுக் கட்சியினரை சந்தித்ததற்கோ, பேசியதற்கோ, கட்சியிலிருந்து யாரும் ஓரம் கட்டப்படவில்லை. அவர்கள் இருவரும், கட்சித் தொண்டர்களுக்கு அது போன்ற
கட்டளையையும் பிறப்பிக்கவில்லை.
கொள்கை பிடிப்பு: கட்சி மற்றும் அரசியலில், ஜெயலலிதா அதிகாரத்துக்கு வந்த பின் தான், இதுபோன்ற நிலை ஏற்பட்டுள்ளது. மாற்றுக்
கட்சியினரை சந்திக்கக் கூடாது என நிர்வாகிகளுக்கோ, தொண்டர்களுக்கோ,
ஜெயலலிதா உத்தரவிடுகிறாரா எனத் தெரியவில்லை. கொள்கையில் பிடிப்பும்,
லட்சியமும் உள்ளவர்கள் எங்கு சென்றாலும், அவர்கள் கொள்கையில் தெளிவாக
இருப்பர். கொள்கைப் பிடிப்பு இல்லாதவர்கள் தான், நட்பு, உறவு என, கொள்கையை இழந்து விடுவர்.
மார்க்சிஸ்ட் எம்.எல்.ஏ., பால கிருஷ்ணன்: திராவிட இயக்கம்பிறப்புக்குப் பின், அரசியல் நாகரிகம் கெட்டுவிட்டது என, திராவிடர் கழகம் வருத்தப்படுவது நியாயமே. குறிப்பாக, தி.மு.க.,விலிருந்து பிரிந்து அ.தி.மு.க., உதயமான பின்பே, இப்போக்கு தீவிரமானது. தி.மு.க.,வும், அ.தி.மு.க.,வும் அவர்களுக்குள், பரஸ்பரம் நாகரிகத்தை கடைபிடிக்காமல் இருப்பது அவர்களுக்கு மட்டுமல்ல; தமிழகத்தின் நலனையே பாதித்துள்ளது. இவர்களின் தனிப்பட்ட விரோதம், தமிழகத்தின் பொது பிரச்னைகளான, காவிரி, முல்லைப் பெரியாறு போன்றவற்றிலும் பிரதிபலிக்கிறது. பிற மாநிலங்களில், எதிர் எதிர் கட்சிகள் இருந்தாலும், மாநில நலனைக் காப்பதில் ஒருமித்து இருப்பர். ஆனால், தமிழகத்தில் அது போன்ற நிலை இல்லை. இதனால், மாநில அரசியலைத் தாண்டி, தமிழகத்தின் உரிமைகளைப் பெறுவதிலும் பின்னடைவு ஏற்பட்டுள்ளது. இவ்வாறு, அவர்கள் கூறினார்.
- நமது சிறப்பு நிருபர் -
- புதியவை
ஏறத்தாழ ஐம்பதாண்டு கால திராவிட கட்சிகள் ஆட்சிகளில் தமிழ்நாட்டில் செழித்து வளர்ந்ததவை ஊழல் மற்றும் டாஸ்மாக் மட்டுமே. சீரழிக்கப்பட்டது அரசியல் நாகரீகம் மட்டுமல்ல தமிழனின் வாழ்க்கையும்தான்...
கருத்து கூறியவற்றில் முறையே ஆவடி குமார் 52 % மதிப்பெண்களும் கே.பி. ராமலிங்கம்: 20 % மதிப்பெண்களும் பால கிருஷ்ணன் 28 % மதிப்பெண்களும் பெறுகின்றனர்.
ஆளும் கட்சியின் தலைமை கழக பேச்சாளர் காவடி குமார் வழக்கம் போல் கட்சி தலைமைக்கு காவடி தூக்கி உள்ளார்..அப்போ நேத்து அம்மேவுக்கு பிறந்த நாள் வாழ்த்து சொன்னது கூட தாஜா பண்ண தான் என்று நினைக்கிறார்...இவனுங்க மாதிரி ஆளுங்க இருக்கிற வரை இந்த கட்சி எல்லாம் உருப்படாமலேயே இருக்கும்...
தம்பிதுரை வாரிசு காங்கிரஸ் தலைவர் வாரிசை கல்யாணம் செய்ததை பற்றி யாராவது சொன்னால் "ஜெ" வை பற்றி முழுமையாக அறிய முடியும்
நான் சிறுவனாக இருந்த பொது எம்ஜிஆர்-கருணாநிதி நட்பு பற்றி கேள்விப்பட்டுள்ளேன். அவர் மறைவுக்கு பின் சேவல் சின்னத்தில் போட்டி இட்ட ஜெயலிதா சட்டசபையில் சில விரும்பத்தகாத செயல்களை சந்தித்தார். இந்த சம்பவத்துக்கு பிறகு தான் அதிமுக-திமுக இடையே சண்டை உச்சம் அடைந்தது. அந்த நிகழ்ச்சி தான் தமிழக அரசியல் கலாச்சாரத்தை புரட்டி போட்டது. இது மாறும் என்ற நம்பிக்கை எனக்கு இல்லை.
நீங்களே சொல்லிவிட்டீர்கள் : கட்சி மற்றும் அரசியலில், ஜெயலலிதா அதிகாரத்துக்கு வந்த பின் தான், இதுபோன்ற நிலை ஏற்பட்டுள்ளது.
இந்த அம்மா இத்தனை படித்திருந்தும் புத்தி மாறவில்லை
திராவிட கட்சிகள் அரசியில் நாகரீகத்தை புதைத்து விட்டார்கள் என்பது சரிதான் ??? ஆனால் தற்சமயம் நிலவும் அசாதாரண அரசில் சுழலில் யார் இதை அதிகம் செய்து கொண்டு உள்ளார்கள் என்பதை எண்ணி பார்க்கவேண்டும். மம்மி திமுக தான் மிகவும் தரம் தாழுந்து நடந்து மற்றவர்களை முகம் சுளிக்க வைக்கும் விதத்தில் அநாகரீகமாக நடகிறார்கள்
மோடியின் மீது உள்ள வயிற்று எரிச்சலில் நிதீஷ் குமார் தனது பரம எதிரி லல்லு பிரசாத்துடனும், முலாயம் உடனும் கூட்டு சேர்ந்து உள்ளதற்கு பெயர் நாகரீகம்? இரு எதிர்கட்சி தலைவர்கள் தற்காலிகமாக சந்திக்கும் போது பேசிக் கொள்வது வேறு, வீணாய் போன ஊழல் கட்சிகள் எல்லாம் ஒன்று கூடி, நாட்டின் நலம் கருதாமல், ஒட்டு போட்ட மக்களின் கருத்தை அறியாமல், வேறு ஒரு பலமான எதிரி கட்சியை அழிக்க கிளம்பியிருப்பதற்கு பெயர் அரசியல் நாகரீகம் இல்லை. அது சந்தர்ப்பவாத அரசியல். மகாராஷ்டிர தேர்தலில் பிஜேபி சிவ சேனாவையும், தேசியவாத காங்கிரஸ்ஐயும் கண்டபடி ஊழல் கட்சிகள் என்று திட்டி ஓட்டு வாங்கி விட்டு, சட்டசபையில் பலத்தை காட்ட வேண்டிய தருணத்தில் அதே தேசியவாத காங்கிரஸ் உடன் கூட்டு. பிறகு சில நாட்கள் கழித்து சிவ சேனா படிந்தவுடன் தேசியவாத காங்கிரஸ்-ஐ கழட்டி விட்டு விட்டு சிவ சேனாவுடன் சேர்ந்து ஆட்சியை பிடிக்க அலைவது போன்ற அரசியல் நமக்கு தேவையில்லை. தற்போது காஸ்மீரிலும் அதே தான் நடக்கிறது.
வடக்கில் தற்போது நடக்கும் கூத்துக்கு பெயர் அரசியல் நாகரீகம் இல்லை. அதற்கு பெயர் சந்தர்ப்பவாத அரசியல்.
பெரியாரும் ராஜாஜியும் இரு துருவங்களாக இருந்தாலும் நண்பர்களாக இருந்தனர். காமராஜரும், ஜீவானந்தமும் எதிர் திசையில் இருந்தாலும் ஒருவர் மற்றவரின் நலம் விரும்பி, பெரிய தலைவர்களை, தன் கட்சியிலேயே வளர்ந்து வருபவர்கள், தமக்கு மேல் இருப்பவர்களை குறிவைத்து, அண்டங்காக்கை, சுவிஸ் வங்கியில் பணம் போட்டு வைத்துள்ளார், மலையாளி, திருப்பதி கணேசா என்றெல்லாம் சகதியை அள்ளி தெளித்து தலைமைக்கு வந்த கருணாநிதிக்கு பிறகே இந்த அரசியல் நாகரீகம் என்பது ஏட்டு கதையானது. பின்வந்த திராவிட இயக்கங்கள் திமுகவின் வயிற்றை கிழித்து வெளிவந்தது என்பதால் தாயின் குணம் மாறாமல் உள்ளது. காரியத்திற்கு காலை பிடிப்பதும் பின்னர் கழுத்தை பிடிப்பதுமான கொள்கையுடைய கருணாநிதியின் காலத்திற்கு பிறகே மெல்ல இங்கு அரசியல் நாகரீகம் திரும்பும்.
Copyright © 2022 Dinamalar - No.1 Tamil website in the world. Designed and Hosted by Web Division,Dinamalar. | Contact us