திண்டுக்கல்: திண்டுக்கல் பெண் உட்பட 8 பேரை ஏமாற்றி திருமணம் செய்தவர், ஆசிரியை வேலைவாங்கி தருவதாகக் கூறி ஒரு பெண்ணிடம் 3 லட்சம் ரூபாய் மோசடி செய்ததாக போலீசார் வழக்குப் பதிவு செய்துள்ளனர். மதுரை புதுார் இ.பி., காலனியை சேர்ந்தவர் சலாமியா பானு,28. இவர் மதுரை போலீஸ் கமிஷனரிடம் அளித்த புகார் மனு:மதுரை எல்லீஸ் நகரை சேர்ந்தவர் காதர்பாட்சா,32. இவர் அருப்புக்கோட்டை வங்கியில் பணியாற்றுவதாக கூறி என்னை திருமணம் செய்தார். கடந்த மேயில் திருமணம் நடந்தது. பின்பு என்னிடம் இருந்த 3 லட்சம் ரூபாய், 8 பவுன் நகை, ஏ.டி.எம்., கார்டுகளை எடுத்துச் சென்றார். ஏ.டி.எம்., கார்டை பயன்படுத்தி 35 ஆயிரம் ரூபாய் எடுத்துள்ளார். எட்டு திருமணங்கள்: எனது கணவருக்கு ஏற்கனவே சென்னையை சேர்ந்த நிர்மலாவுடன் திருமணமாகி 3 குழந்தைகள், திண்டுக்கல்லை சேர்ந்த ஜமுனாராணியை திருமணம் செய்து 2 குழந்தைகள் உள்ளனர். மேலும் வத்தலக்குண்டு மகாலட்சுமி உட்பட 8 பேரை ஏமாற்றி திருமணம் செய்துள்ளார். இதையறிந்து அதிர்ச்சியடைந்தேன் என கூறியிருந்தார். அவர்மீது மாவட்ட குற்றப்பிரிவு போலீசார் வழக்குபதிவு செய்துள்ளனர்.மோசடி வழக்கு:திண்டுக்கல் எம்.எஸ்.பி., பள்ளி அருகே வசிப்பவர் கார்த்திகாயினி,27. இவரது கணவர் மோகன்ராஜ்,30. இவர்கள் வீட்டருகே குடியிருப்பவர் மூலம் காதர்பாட்சா பழக்கமானார். அவர், கார்த்திகாயினிக்கு சிங்கப்பூரில் ஆசிரியை வேலை வாங்கி தருவதாக கூறி 3 லட்சம் ரூபாய் பெற்றுள்ளார்.ஆனால், பேசியபடி ஆசிரியை வேலை வாங்கித்தரவில்லை. பணத்தையும் திருப்பித் தரவில்லை. தற்போது தலைமறைவாகி விட்டார். இது குறித்து கார்த்திகாயினி புகாரின் பேரில் திண்டுக்கல் மாவட்ட குற்றப்பிரிவு இன்ஸ்பெக்டர் காவேரி வழக்குப்பதிவு செய்தார். தனிப்படை அமைத்து, காதர்பாட்சாவை தேடி வருகின்றனர்.