இறக்குமதியை உடனே நிறுத்துங்கள்; இந்தியாவுக்கு அமெரிக்கா எச்சரிக்கை| Dinamalar

இறக்குமதியை உடனே நிறுத்துங்கள்; இந்தியாவுக்கு அமெரிக்கா எச்சரிக்கை

Updated : ஏப் 23, 2019 | Added : ஏப் 23, 2019 | கருத்துகள் (40)
Share
இறக்குமதி,நிறுத்துங்கள்,இந்தியா,அமெரிக்கா,எச்சரிக்கை

வாஷிங்டன்: ஈரானிடம் இருந்து கச்சா எண்ணெய் இறக்குமதி செய்வதை, உடனடியாக நிறுத்தவில்லை எனில், பொருளாதார தடையை சந்திக்க நேரிடும் என, இந்தியா, சீனா உட்பட ஐந்து நாடுகளுக்கு அமெரிக்கா எச்சரிக்கை விடுத்துள்ளது.

மேற்கு ஆசிய நாடான ஈரானிடம் இருந்து, இந்தியா உட்பட, பல்வேறு உலக நாடுகள், கச்சா எண்ணெயை இறக்குமதி செய்து வருகின்றன. ஈரானிடம் இருந்து எண்ணெய் வாங்கும் நாடுகளில், இந்தியா இரண்டாம் இடத்தில் உள்ளது.

இந்நிலையில், ஈரானுடனான அணுசக்தி ஒப்பந்தத்தில் இருந்து, அமெரிக்கா கடந்த ஆண்டு விலகியது. இதையடுத்து, அந்நாட்டுடன், மற்ற நாடுகளுக்கு உள்ள வர்த்தக உறவை சீர்குலைக்கும் முயற்சியில், அமெரிக்கா ஈடுபட்டு வருகிறது. இந்தியா, சீனா உட்பட, ஈரானிடம் இருந்து கச்சா எண்ணெய் வாங்கும் அனைத்து நாடுகளும், தங்கள் இறக்குமதியை உடனடியாக நிறுத்த வேண்டும் என, அமெரிக்கா எச்சரித்தது.


latest tamil news



இந்த இறக்குமதியை நிறுத்த, இந்தியா உட்பட எட்டு நாடுகளுக்கு, ஆறு மாதம் அவகாசம் அளித்தது. அது முடிவடைந்த நிலையில், இந்தியா, சீனா உட்பட அனைத்து நாடுகளும், தங்கள் இறக்குமதியை, உடனடியாக நிறுத்தவேண்டும் என, அமெரிக்கா கேட்டுக் கொண்டுள்ளது. இல்லையெனில், அந்நாடுகள் மீது பொருளாதார தடை விதிக்கப்படும் என, எச்சரித்துள்ளது. அமெரிக்காவின் அறிவிப்பு குறித்து, பரிசீலித்து வருவதாகவும், உரிய நேரத்தில், முடிவு அறிவிக்கப்படும் என, இந்தியா தெரிவித்துள்ளது.

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X