தங்கம் எடுத்து வந்ததில் தவறுகள்: ஆந்திர தலைமை செயலர் ஒப்புதல்| Dinamalar

பொது செய்தி

இந்தியா

தங்கம் எடுத்து வந்ததில் தவறுகள்: ஆந்திர தலைமை செயலர் ஒப்புதல்

Updated : ஏப் 25, 2019 | Added : ஏப் 25, 2019 | கருத்துகள் (11)

திருப்பதி: ''சென்னை, பஞ்சாப் நேஷனல் வங்கியிலிருந்து, திருமலைக்கு, தங்கக்கட்டிகள் கொண்டு வந்த விஷயத்தில், தவறுகள் நடந்துள்ளது உண்மைதான்,'' என, ஆந்திர அரசின், தலைமை செயலர், எல்.வி.சுப்ரமணியம் தெரிவித்துள்ளார்.






திருப்பதி தேவஸ்தானத்திற்கு சொந்தமான, 1,381 கிலோ தங்கம், சென்னை, பஞ்சாப் நேஷனல் வங்கியிலிருந்து, திருப்பதிக்கு கொண்டு செல்லும் வழியில், தேர்தல் ஆணையத்தின், பறக்கும் படையினரால் தமிழகத்தில், கைப்பற்றப்பட்டது.இது குறித்து, ஊடகங்களில் வெளி வந்த செய்திகள், தேவஸ்தானம் மற்றும் ஆந்திர அரசு மீது சந்தேகத்தை ஏற்படுத்தின.


உத்தரவு:


இது பற்றி, விரிவாக விளக்கம் அளிக்க வேண்டும் என, தேவஸ்தான அதிகாரிகளுக்கும், வருவாய்த்துறை செயலருக்கும், ஆந்திர அரசின், தலைமை செயலர், சுப்ரமணியம் உத்திரவிட்டார். அதன்படி நேற்று, வருவாய்த்துறை செயலர், மன்மோகன் சிங், தலைமை செயலரிடம் அறிக்கை சமர்ப்பித்தார்.





அது குறித்து, தலைமை செயலர் கூறியதாவது: திருப்பதி தேவஸ்தானத்துக்கு சொந்தமான தங்கம், சென்னை வங்கியிலிருந்து, எடுத்து வரப்பட்டது குறித்து, முழு அறிக்கை சமர்ப்பிக்கப்பட்டுள்ளது. இது, உடனடியாக, ஆந்திர முதல்வர், சந்திரபாபு நாயுடுவின் மேற்பார்வைக்கு அனுப்பப்பட்டது. தங்கத்தை எடுத்து வந்ததில், தவறுகள் நடந்துள்ளது உண்மை தான். அதிக மதிப்பிலான, தங்கம் ஓரிடத்திலிருந்து, மற்றொரு இடத்திற்கு கொண்டு செல்லும் போது, தகுந்த பாதுகாப்பு ஏற்பாடுகள் செய்ய வேண்டியது கட்டாயம்.






கடமை:


ஆனால், இதில், தேவஸ்தான அதிகாரிகளும், வங்கி அதிகாரிகளும் அஜாக்கிரதையாக நடந்துள்ளனர். தேர்தல் நடத்தை விதிமுறைகள், அமலில் உள்ள போது, அரசு அதிகாரிகள், விதிகளுக்கு உட்பட்டு நடந்து கொள்ள வேண்டியது அவர்களின் கடமை. இவ்வாறு அவர் கூறினார்.

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X