கர்தார்பூர் சாலைப்பணி: தயாராகிறது பாக்.,| Dinamalar

கர்தார்பூர் சாலைப்பணி: தயாராகிறது பாக்.,

Updated : மே 15, 2019 | Added : மே 15, 2019 | கருத்துகள் (9)
Share
கர்தார்பூர் சாலைப்பணி: தயாராகிறது பாக்.,

லாகூர்:'கர்தார்பூர் சாலைப்பணிகள் துவங்க புதிய அரசுடன் பேச்சுவார்த்தை நடத்தப்படும்' என பாகிஸ்தான் தெரிவித்துள்ளது.
சீக்கிய மதத்தைத் தோற்றுவித்த குருநானக் பாகிஸ்தானிலுள்ள கர்தார்பூரில் 18 ஆண்டுகள் வாழ்ந்தார். அவர் நினைவாக இந்திய எல்லையில் இருந்து 3 கி.மீ. தொலைவில் ராவி நதிக்கரையில் 'தர்பார் சாஹிப்' என்ற பெயரில் குருத்வாரா அமைக்கப்பட்டுள்ளது. கர்தார்பூருக்கு சீக்கியர்கள் விசா இன்றி புனிதப்பயணம் மேற்கொள்ள சாலை அமைக்க இந்தியாவின் குருதாஸ்பூரையும் கர்தார்பூரையும் இணைக்க திட்டமிடப்பட்டது. கடந்த ஆண்டு நவம்பரில் இருநாட்டு பகுதிகளிலும் அடிக்கல் நாட்டப்பட்டது.


latest tamil news


இதற்கான ஆரம்பக்கட்ட பணிகள் நடந்து வந்த நிலையில் பிப்.14ல் ஜம்மு-- காஷ்மீர் புல்வாமா மாவட்டத்தில் சி.ஆர்.பி.எப். வீரர்கள் மீது பயங்கரவாதிகள் நடத்திய தற்கொலை தாக்குதலில் 40 வீரர்கள் உயிரிழந்தனர். இதற்குப் பதிலடியாக இந்திய விமானப்படை பாகிஸ்தானின் பாலாகோட் பகுதியில் அமைந்துள்ள பயங்கரவாத முகாம்களை தாக்கி அழித்தது.இதைத் தொடர்ந்து இருநாட்டுக்கும் இடையே பதற்றமான சூழல் ஏற்பட்டதால் கர்தார்பூர் சாலைப்பணியில் தேக்கம் ஏற்பட்டது.

இதுகுறித்து பேச்சுவார்த்தை நடத்த பாகிஸ்தான் தரப்பில் குழு அமைக்கப்பட்டது. அக்குழுவில் தனி நாடு கோரும் காலிஸ்தான் பிரிவினைவாதிகள் அதிகம் இருப்பதாக இந்தியா குற்றம் சாட்டியது. இதனால் கடந்த ஏப்ரலில் நடைபெற இருந்த பேச்சுவார்த்தை ரத்து செய்யப்பட்டது.இந்நிலையில் இந்தியாவில் அமைய உள்ள புதிய அரசுடன் கர்தார்பூர் சாலைத்திட்டம் குறித்து பேச்சுவார்த்தை நடத்தப்பட உள்ளதாக பாகிஸ்தான் தெரிவித்துள்ளது. இது குறித்து அந்நாட்டின் 'எக்ஸ்பிரஸ் டிரிப்யூன்' நாளிதழ் வெளியிட்டுள்ள செய்தி: கர்தார்பூர் வழித்தடம் அமைப்பதில் பாகிஸ்தான் எந்த காலதாமதமும் செய்யவில்லை. இந்தியா தான் பிடிவாதம் பிடிக்கிறது. அங்கு பார்லிமென்ட் தேர்தல் முடிவடைந்தபின் புதிய அரசுடன் பேச்சுவார்த்தை நடத்த அரசு தயாராக உள்ளது' என குறிப்பிடப்பட்டுள்ளது.

Advertisement


We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X