பொது செய்தி

தமிழ்நாடு

வரம் தரும் மரம் நடுவோம்

Updated : மே 20, 2019 | Added : மே 20, 2019 | கருத்துகள் (4)
Advertisement

திண்டுக்கல்:வரலாறு காணாத வகையில் சுட்டெரிக்கும் வெயில் பூமி வெப்பமாகி வருவதை நன்கு உணர்த்துகிறது.







ஆண்டுதோறும் அதிகரித்து வரும் வெயிலுக்கு அதிகமான மரங்களை வெட்டுதல், நகரமய மாக்கல், மக்கள் தொகை பெருக்கம், மின்சாதனங்கள் பயன்பாடு, நான்கு வழிச்சாலைகள் மற்றும் எரிபொருள்களால் வெளியேற்றப்படும் வாயுக்கள் தான் காரணம். தற்போது தமிழகத்தில் பாலைவனத்திற்கு நிகரான வெப்பநிலை நிலவுகிறது.


பழநி – கொடைக்கானல் ரோடு

பழநி – கொடைக்கானல் ரோடு





சொல்லப்போனால் ஒரு காலத்தில் பாலைவனப் பகுதிகளில்தான் 39 முதல் 42 டிகிரி செல்சியஸ் வெப்பநிலை இருக்கும். காலப்போக்கில் தமிழகம் பாலைவனம் போல் மாறிவருகிறது. இந்தாண்டு தமிழகத்தில் நிலவும் அதிகபட்ச வெப்பநிலை 39 டிகிரி செல்சியஸ் ஆகும்.


மூங்கில் மரம்– சிறுமலை

மூங்கில் மரம்– சிறுமலை



Advertisement




யார் காரணம்


மனிதர்களும், மனிதர்களின் செயல்பாடுகளும் தான் இந்த நிலைக்கு காரணம். காலத்தால் இந்த வெப்ப நிலை குறைவதற்கு இன்னும் சில ஆண்டுகள் ஆகும். இந்தியாவில் மக்கள் தொகைக்கு இணையாக இருந்த மரங்களின் எண்ணிக்கை கால் பங்காகி விட்டது.






மரங்கள் சுற்றுப்புறத்தில் உள்ள அசுத்த காற்றை உள்வாங்கி புதிய காற்றை வெளிவிடுகிறது. மண் அரிப்பை தடுத்து நிலத்தை உறுதியாக வைத்திருக்க உதவுகிறது. பூமியிலிருந்து நீரை சுழற்சி செய்து, காற்றில் ஈரப்பதத்தை தக்க வைக்கிறது. நாம் வாழ மட்டுமின்றி பறவைகள், பூச்சிகள், விலங்களுக்கும் அடைக்கலம் கொடுக்கிறது. மழைக்கு முக்கிய காரணங்களே மரங்கள்தான். அவை அழிந்து வருவதால் மழை காணாமல் போய் வருகிறது.






நாம் உயிர் வாழ காற்று அவசியம். அந்த காற்றில் 21 சதவீதம் நாம் சுவாசிக்கும் ஆக்சிஜன் இருக்கிறது. மரங்கள் கார்பன் டை ஆக்சைடை எடுத்து கொண்டு நமக்கு தேவையான ஆக்சிஜனை தருகிறது. ஒரு மனிதனுக்கு ஒரு நாளைக்கு 800 கிராம் ஆக்சிஜன் தேவை என ஆராய்ச்சியில் தெரியவந்துள்ளது. பல்வேறு காரணங்களுக்காக மரங்களையெல்லாம் வெட்டி வீழ்த்தி வருகிறோம். இதனால் காற்றை விலை கொடுத்து வாங்கும் நிலையை நோக்கி சென்று கொண்டிருக்கிறோம்.


செம்பட்டி – ஒட்டன்சத்திரம் ரோடு

செம்பட்டி – ஒட்டன்சத்திரம் ரோடு





ஏப்ரல் பூ(கூ)ல்கோடை காலம் வந்தால் மட்டும் தான் நமக்கெல்லாம் மரங்களை பற்றிய ஞாபகம் வரும். சுட்டெரிக்கும் வெயிலை சமாளிக்க முடியாமல் 'ஏப்ரல் பூல்' தினத்திற்கு 'ஏப்ரல் கூல்' என பெயர் வைத்து மரங்களை நட்டு வைக்கும் கலாசாரம் உருவாகி வருகிறது. மரங்களை நட்டு வைத்தால் மட்டும் போதுமா... அவை பிற உயிர்களை வாழ வைக்க உயிர்ப்புடன் வளர விடுவதும் நம் கையில் தான் இருக்கிறது.
உண்மையில் சொல்லப்போனால் இன்னும் எஞ்சி இருக்கும் மரங்களால் தான் நாம் உயிர் வாழ முடிகிறது. காற்றை சுவாசிக்க முடிகிறது. நம் வாழ்க்கையில் மரங்களின் பங்கு எண்ணற்றது. கோடை காலத்தில் நிழலை, காற்றாடியை, ஏ.சி.,யை தேடி செல்லும் நாம்... வாழ உதவியாக இருக்கும் மரங்களை பாதுகாப்பதும் அவசியம் தான்.மரங்களை பாதுகாக்கலாம்மார்ச் முதல் மே வரை கோடை காலம் தான்.
இந்த காலங்களில் கடும் வறட்சிக்கு பஞ்சம் இருக்காது. நீர் நிலைகள் வறண்டு போய், வான் மழைக்கு ஏங்கும். விவசாயம், உணவுக்கு பெரும் பாதிப்பு ஏற்படும். இந்த சமயங்களில் மரங்களுக்கு தண்ணீர் கொடுப்பதும், நட்டு வளர்ப்பதும் அவ்வளவு சுலபமில்லை. வரப்பு ஓரங்களில் இருக்கும் மரங்களுக்கு வயலுக்கு பாய்ச்சும் தண்ணீர் போதுமானது. ரோட்டோரம், வீட்டின் அருகே இருக்கும் மரங்களுக்கு குறைந்தது பத்து நாட்களுக்கு ஒரு முறையாவது தண்ணீர் கொடுக்க வேண்டும். கோடை காலத்தில் மரக்கன்றுகள் நடுவதை தவிர்க்கலாம்.
இந்த சமயத்தில் மரம் நடுவது தண்ணீரை வீணடிப்பதோடு, பண இழப்பையும் ஏற்படுத்தும். புதிதாக நடும் மரக்கன்றுகள் கோடை காலத்தில் வேர்ப்பிடித்து வளர்வதற்கு மிகுந்த சிரமப்படும். அதனால் மரக்கன்றுக்கு தேவையான தண்ணீர் கிடைக்காது. ஆடிப்பட்டம் தேடி விதை என்பார்கள். அந்த சமயத்தில் பயிர் விதைப்பது போல், மரக்கன்றுகளை நட்டு வளர்த்தால் அசைக்க முடியாத மரமாக வளரும். காரணம் அச்சமயம் பெய்யும் பருவ மழை மரத்திற்கு தேவையான அனைத்து சக்தியையும் கொடுக்கும். இதனால் சாதாரண நாட்களில் நாம் கொடுக்கும் தண்ணீரை விட, வேகமாக மழைநீரை உறிஞ்சி வளரும். எனவே, கோடை காலத்தில் மரக்கன்றுகளை நடுவது என்பது தேவையில்லாத வேலை. இந்த நேரத்தில் ஏற்கனவே இருக்கும் மரங்களை பாதுகாப்பதில்தான் நம் கவனம் இருக்க வேண்டும்.


எப்படி மரம் வளர்க்கலாம்



வெயிலில் இருந்து தப்பிக்க, கோடை நிழலுக்கு வேம்பு, புங்கன், பூவரசு, மலைப்பூவரசு, காட்டு அத்தி, வாத மரம் வளர்க்கலாம். நகர் பகுதியோ, கிராமப்புறமோ ரோட்டோரத்தில் புளி, வாகை, செம்மரம், ஆலமரம், அத்தி, அரசமரம் வளர்க்கலாம். மரக்கன்று 2 அடி உயரம், கிளை வேர்களுடன் இருக்க வேண்டும். வெயில் படும் இடத்தில் நட வேண்டும்.
தரைமட்டத்தில் இருந்து வேர் ஒரு அடி ஆழத்தில் நடவு செய்தால் ஈரப்பதம் கிடைக்கும், வேகமாக வீசும் காற்றை கூட தாங்கி வளரும். உயிர் உரங்களை வேருக்கு இடுவதாலும் வறட்சியை தாங்கி வளரும். பஞ்சகாவியம் கரைசலை தெளித்து வந்தால் வறட்சியை தாங்குவதோடு, பூச்சி, நோய் தாக்குதலின்றி நன்கு வளரும். கோடை காலத்தில் பக்க கிளைகளை வெட்டி விட வேண்டும். அதன் மூலம் நீராவி போக்கு அதிகரித்து மரங்கள் காய்ந்து இறப்பதை தடுக்கலாம்.
சராசரியாக சில வகை மரங்கள் 25 அடி வரையும், காடுகளில் வளரும் மரங்கள் 300 அடி உயரம் வளரும். சில வகை மரங்கள் 150 முதல் 500 ஆண்டுகள், காடுகளில் வளரும் மரங்கள் 2 ஆயிரம் ஆண்டுகள் வரை வாழும்.செம்மண், கரிசல் மண்ணில் வளர்க்கப்படும் மரங்கள் வேகமாக வளரும். மரம் வளர்ப்பில் மிக முக்கியமானது நீர் மேலாண்மை. மரத்தை சுற்றி சிறிது குழி அமைத்து மழை நீர் தேங்கும் படி செய்ய வேண்டும். வீட்டில் வீணாகும் தண்ணீர் நேரிடையாக மரத்திற்கு கிடைக்கும் வகையில் வரப்பு அமைக்க வேண்டும்.
கோடை காலத்தில் தண்ணீர் தட்டுப்பாடு இல்லாத இடங்களாக இருந்தால் காலை, மாலையில் தண்ணீர் ஊற்றலாம். மேற்கண்ட தொழில்நுட்ப முறைகளை பின்பற்றி மரம் வளர்த்தால் நமக்கும், வீட்டுக்கும் நாட்டுக்கும் நன்மை வந்து சேரும். இந்த வரிசையில் ஆக்சிஜனை அதிகளவு உற்பத்தி செய்யும் மரங்களுள் மூங்கிலுக்கு முக்கிய பங்கு உண்டு.மூங்கிலுக்கு அடுத்த படியாக புங்கை மரம் தகுதியானது.
நாம் ஒவ்வொருவரும் வீட்டிற்கு ஒரு புங்கை மரம் நட்டு வளர்த்தால் தேவையான சுத்தமான ஆக்சிஜனை அந்த மரங்களே நமக்கு தரும். கோடி நன்மைகள் செய்யும் மரங்களை பேணி பாதுகாப்பது நம் கடமை. நம்ம ஊரு திண்டுக்கல்லில் மரங்களை வளர்ப்பதிலும், பாதுகாப்பதிலும் ஆர்வமுடையவர்கள் பலர் இருக்கின்றனர். நீங்களும் அந்த பட்டியலில் சேர உடனே மரம் நட்டு வளருங்க
.ஆ.நல்லசிவன்.படம்: கே.மணிகண்டன்


தண்ணீரை விலைக்கு வாங்கி காப்பாற்றினேன்



டெய்லரிங் தொழில் செய்யும் எனக்கு மரம் வளர்ப்பதில் அதிக ஆர்வம் ஏற்பட்டது. சொந்த பணத்தில் மொட்டணம்பட்டியில் வேம்பு, புங்கம், கொன்னை, வாகை, செரி, அடுக்கரளி, மலைக்கொன்னை, ஆலம், அரசு என நிழல் தருபவை, தென்னை, புளி ஆகிய நீண்ட காலத்திற்கு பலன் தரும் மரங்களை நட்டு வளர்த்துள்ளேன்.
மரக்கன்று நட்டதுடன் கடமை முடிந்தது என கருதாமல் ஆடு, மாடுகளால் பாதிப்பு ஏற்படாத வகையில் கூண்டுகளை அமைத்து பராமரித்தும், கடும் வறட்சியிலும் தண்ணீரை விலைக்கு வாங்கியும் மரக்கன்றுகளை காப்பாற்றினேன். இதனால் கிராமத்தில் எல்லா திசைகளிலும் பச்சை பசேல் என மரங்களாக காட்சியளிக்கின்றன. கஜா புயல் மற்றும் புதிய மின்திட்ட பணியில் சில மரங்களை இழந்தது வருத்தமாக இருந்தது. எதிர்காலத்தில் இன்னும் அதிக மரங்களை வளர்க்க முயற்சிப்பேன்.
-பி.பலராமன், வடமதுரை


திண்டுக்கல் வனமாகும்



'திண்டிமா வனம்' அமைப்பு உறுப்பினர், திண்டுக்கல் மாவட்டம் மழை வளம் குறைந்த மாவட்டம். எனவே மரங்களை நட திட்டமிட்டோம். 2016 ல் திண்டி மா வனம் எனும் அமைப்பை துவங்கி இதுவரை 1.20 லட்சம் மரங்கள் நட்டு பராமரிக்கிறோம்.திண்டுக்கல் எம்.வி.எம்., அரசு மகளிர் கலை கல்லுாரியில் 130 வகையான 4,500 மரங்களை நட்டுள்ளோம்.
தனியார் உதவியுடன் 4 டிராக்டர்களில் மரங்களுக்கு தினமும் தண்ணீர் வழங்குகிறோம். நீர் நிலைகளை மீட்க கலெக்டர் மற்றும் தனியார் பங்களிப்புடன் சேர்ந்து 150 கி.மீ., துாரம் குளங்களை துார்வாரியுள்ளோம். 3500 ஏக்கரில் 55 குளங்கள், கண்மாய்களை துார்வாரி உள்ளோம். வேம்பு மரத்தின் பயன் அளவில்லாதது. கன்னிவாடி அருகே 5 ஏக்கரில் வேம்பு நட்டு பராமரிக்கிறோம். திண்டுக்கல்லை மரங்கள் நிறைந்த மாவட்டமாக மாற்றுவதே எங்கள் நோக்கம். ஆர்வமுடையர்கள் எங்கள் அமைப்பில் சேரலாம்.
-ராஜாராம், உறுப்பினர், 'திண்டிமா வனம்'-


சுவாசிக்க மரம் தேவை



பல்வேறு தேவைகளுக்காக ஆண்டுக்கு சராசரியாக 50 லட்சம் மரங்கள் வெட்டப்படுகின்றன. நாகரீக வளர்ச்சிக்காக, காட்டை அழித்து வருகிறோம். அதன் விளைவாக மழை பெய்வது குறைந்து பூமி வெப்பமாவது அதிகரித்துள்ளது. இதனால் ஆண்டு தோறும் கோடை காலமட்டுமின்றி சாதாரண நாட்களிலும் வெயிலின் தாக்கம் அதிகரிக்கிறது.
கோடை காலத்தில் மரங்களை நட்டு வளர்ப்பது சிரமமான ஒன்று. மரங்களை நடுவது மட்டுமின்றி பேணி வளர்ப்பது மிக அவசியம். நாம் 3 வேளை உணவு எடுத்து கொள்வது போல் மரங்களுக்கும், தாவரங்களுக்கு தேவையான தண்ணீரை வழங்க வேண்டும். ஒரு தெருவில் புங்கை, வேம்பு மரங்களை நட்டால் 30 வீடுகளில் இருப்பவர்களுக்கு தேவையான ஆக்சிஜனை அந்த மரங்கள் வழங்கும். காற்று மாசுபடுவதை தடுக்கும்.
ரோட்டோரங்களில் வாகை, கொன்றை மரங்களை வளர்க்கலாம்.வரும் காலங்களில் வீட்டிற்கு ஒரு மரம் நட்டு வளர்த்தால் மட்டுமே நாம் சுவாசிக்க முடியும். மரங்களை வெட்டுவதால் மண் அரிப்பு ஏற்பட்டு நிலச்சரிவு ஏற்படுகிறது. பூமி வெப்பமாகி பனிப்பாறைகள் உருகி வருகின்றன. மரம் வளர்ப்பதை அரசு கட்டாயமாக்க வேண்டும். இல்லையெனில் தண்ணீரை தேடி அலையும் நிலை வரும், என்றார்.
-பிரிட்டோ ராஜ், வேளாண் பொறியாளர், திண்டுக்கல்


பசுமை நாயகன் எம்.ஜி.ஆர்.,



வேடசந்துார்: ஸ்ரீராமபுரம் ஊராட்சியை சேர்ந்தவர் எம்.ஜி.ஆர்., என்ற மாணிக்கம். கூலி வேலை செய்து வரும் இவர், தனக்கு பிறகும் பெயர் சொல்லும் அளவில் சொந்த ஊரில் மரங்களை வளர்த்து வருகிறார். மரக்கன்றுகளை நட்டு, அதற்கு வேலியடைத்து, தானே தண்ணீரை சுமந்து ஊற்றி பாதுகாக்கிறார். இங்குள்ள அரசு பள்ளிக்கு முன்பாகவும் மாணவர்களின் நலன் கருதி வேப்பமரங்களை நட்டு வளர்த்து வருகிறார். நேற்றும் பட்டுப்போன இரண்டு மரக்கன்றுகளுக்கு பதில் புதிதாக இரண்டு மரக்கன்றுகளை நட்டதாக கூறுகிறார்.

வயதான காலத்தில் நுாறு நாள் வேலைக்கு சென்று வந்தாலும், மீதியுள்ள நேரங்களில் இவர் வளர்த்து வரும் மரக்கன்றுகளை பராமரிப்பதிலேயே காலத்தை கழிக்கிறார். இது குறித்து இவரிடம் கேட்டபோது, 'எப்படியே நம்ம காலத்துக்குள்ள ஊரை பசுமையாக்க வேண்டும்' என்றார்.


மரங்களும், பயன்களும்


உரம் - புங்கம், வாகை, வாதநாராயணன், ஓதியன், கல்யாண், முருங்கை, பூவரசு.
கால்நடை தீவனம் - வாகை, ஓதியன், வெள்வேல், கருவேல்.
விறகு - சீமைக்கருவேலம், வேலமரம், யூகலிப்டஸ், சவுக்கு, குருத்தி,
கட்டுமான பொருள் - கருவேல், பனை, தேக்கு, மூங்கில், விருட்சம், பிள்ளமருது, வேங்கை, விடத்தி, வேம்பு.
மருந்து பொருள் - கடுக்காய், தானிக்காய், எட்டிக்காய்.
தோல் பதனிடுதல் - கடுக்காய், திவி திவி, தானிக்காய்.
பஞ்சு - காட்டிலவு, முள்ளிலவு
தீப்பெட்டி - பீமரம், முள்ளிலவு, பெருமரம்.
மை தயாரிக்க - கடுக்காய், திவி திவி, தானிக்காய்.
பூச்சி மருந்து - வேம்பு, புங்கம், ராம்சீதா, அரளி.
கோயில்கள் - வேம்பு, வில்வம், நாகலிங்கம், தங்க அரளி, நொச்சி, மஞ்சரளி.
நீர் நிலைகள் - கருவேலம், தேக்கு, தைல மரம், இலுப்பை, மூங்கில், நாவல், புங்கன், இலவமரம்.

Advertisement




வாசகர் கருத்து (4)

  • புதியவை
  • பழையவை
  • அதிகம் விவாதிக்கப்பட்டவை
  • மிக மிக தரமானவை
  • மிக தரமானவை
  • தரமானவை
mohan - chennai,இந்தியா
20-மே-201913:47:00 IST Report Abuse
mohan நல்ல பயனுள்ள கட்டுரை தான். ஆனால் உலக அளவில் தீய எண்ணங்கள் அதிகமாகி விட்டன... இதன் விளைவு, கடல் போல் சாலைகள், இந்த சாலைகளுக்கேற்ப மரங்கள் இல்லை. முப்பது அடிகளில் இருந்த நீர் ஆதாரம், கடந்த நாற்பது ஆண்டுகளில், ஆயிரம் அடிக்கு மேல் சென்று விட்டன. இதன் அறிகுறிகளை யாரும், கவனிக்க தயாரில்லை... ஏனென்றால், எந்த பகுதி எடுத்தாலும், எவன் எப்படி போனால் என்ன. நமக்கு தான் AC உள்ளதே என்கின்ற மனப்பான்மை... இதன் விளைவு இந்தியா சீக்கிரம் பாலைவனம் ஆகிவிடும். அதுவும், தமிழ் நாடு சொல்லவே வேண்டாம்... பாலை வானம் ஆக்குவதற்கு ஓநாய்கள் வெகு பகீரத்தனம் செய்கின்றன. பரவா இல்லை... நீர் ஆதாரத்தை முறை படுத்தி, கழிவு நீர்களை முறை படுத்தி, மரங்கள் அதிகம் வளர்த்து, நாட்டின் சுற்றுப்புற சூழ்நிலையை நன்றாக பராமரிக்கலாம். இப்போது அதிகாரத்தில் உள்ளவர்கள், யாரா இருந்தாலும், அவர்களும் சேர்ந்து தான் பாதிக்க படுவர். ஆகவே, தமிழ் நாட்டின் நீர்வளங்களை, போர்க்கால அடிப்படையில் மேம்படுத்த வேண்டும். நீர்வளங்கள் அதிகமானால், மரங்கள் அதிகமாகும். அரசு பார்த்து ஒரு ஏற்பாடு செய்தால், தமிழ் நாட்டு மக்கள் அனைவரும், நீர் வளங்களை பாதுகாக்க தயாராக இருப்பர்... நாம், நம் சந்ததிகளுக்கு பாலைவனத்தை, விட்டு செல்ல வேண்டாம்.
Rate this:
Share this comment
Cancel
திண்டுக்கல் சரவணன் - ஓசூர்,இந்தியா
20-மே-201913:21:42 IST Report Abuse
திண்டுக்கல் சரவணன் திண்டுக்கல் - தேனி, திண்டுக்கல் - பழனி சாலையில் 100 வருடங்கள் கடந்தது இருந்த புளிய மரங்கள் சாலை விரிவாக்க பணிக்காக வெட்டப்பட்டன. அதை ஈடு செய்யும் எந்த முயற்சியும் மத்திய அரசுதுறை செய்வில்லை. ஒரு காலத்தில் சுவர்க்கமா காட்சி அளித்த சாலை இன்று பாலைவனமாக உள்ளது =
Rate this:
Share this comment
Cancel
JeevaKiran - COONOOR,இந்தியா
20-மே-201910:48:21 IST Report Abuse
JeevaKiran மரம் வளர்ப்பதை அரசு கட்டாயமாக்க வேண்டும். இல்லையெனில் தண்ணீரை தேடி அலையும் நிலை வரும-அரசின் கட்டுப்பாட்டில் இருப்பவர்கள்தான் மரங்களை வெட்டுகிறார்கள். இதை என்ன வென்று சொல்லவது. சென்னை பெங்களூரு நான்குவழி சாலைகளில் இருந்த மரங்களை வெட்டியது யார்? ஒரு மரம் வெட்டினால், இத்தனை மரங்கள் நடவேண்டும் என்று கோர்ட் ஆர்டர் இருக்கு. ஆனால் ஒரு மரமாவது வைத்திருப்பார்களா? கோர்ட்டிலிருந்து ஆட்கள் போய் பார்க்கட்டும். ஒரு மரம் கூட இல்லை. இந்த சாலை அமைத்து சுமார் 20 வருடங்கள் ஆகிறது. மரம் நட்டிருந்தால், இந்த கால கட்டத்தில் சுமார் 20 அடி உயரத்திற்கு வளர்ந்திருக்கும். அரசுக்கு நாட்டு மக்கள் மீது அக்கறை இல்லை.
Rate this:
Share this comment
Cancel

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை

We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X