ஜெய்ப்பூர் : ராஜஸ்தான் உணவு வழங்கல் துறை செயலரின் தலைமையில் நடைபெற்ற அதிகாரிகள் ஆய்வு கூட்டத்தில், 'கம்ப்யூட்டர்' திரையில் திடீரென ஆபாச, 'வீடியோ' திரையிடப்பட்டது.
ராஜஸ்தானில், முதல்வர் அசோக் கெலாட் தலைமையில், காங்கிரஸ் ஆட்சி நடக்கிறது. ஜெய்ப்பூரில் உள்ள தலைமை செயலகத்தில், மாநில உணவு வழங்கல் துறையின் திட்டங்கள் குறித்த ஆய்வுக் கூட்டம், நேற்று நடைபெற்றது. உணவு வழங்கல் துறை செயலர், முக்தா சிங், கூட்டத்திற்கு தலைமை வகித்தார். உணவு வழங்கல் துறை மற்றும் தேசிய தகவல் மைய அதிகாரிகள் 10 பேர், கூட்டத்தில் கலந்து பங்கேற்றனர். மேலும், 33 மாவட்டங்களை சேர்ந்த வினியோக அதிகாரிகள், 'வீடியோ கான்பரன்சிங்' மூலம் கூட்டத்தில் பங்கேற்றனர்.
கூட்டம் நடந்து கொண்டு இருந்தபோது, கம்ப்யூட்டர் திரையில், திடீரென ஆபாச, 'வீடியோ' ஓடியது. இதனால் அதிகாரிகள் அதிர்ச்சி அடைந்தனர். இந்த தவறு யாரால் நடந்தது என்பது குறித்து விசாரணை நடத்தி, அறிக்கை தருமாறு, தேசிய தகவல் மைய இயக்குனரிடம், துறை செயலர் கேட்டுக் கொண்டுள்ளார்.
