மோதலில் மே.வங்கம்: கவர்னர் முக்கிய முடிவு| Dinamalar

மோதலில் மே.வங்கம்: கவர்னர் முக்கிய முடிவு

Updated : ஜூன் 12, 2019 | Added : ஜூன் 12, 2019 | கருத்துகள் (10)

கோல்கத்தா : பா.ஜ., - திரிணாமுல் காங்., இடையேயான தொடர் மோதல் காரணமாக மேற்குவங்கம் கலவர பூமியாக மாறி உள்ளது.





லோக்சபா தேர்தலுக்கு முன்பே பா.ஜ., - திரிணாமுல் இடையே துவங்கிய மோதல் இதுவரை ஓயவில்லை. இருகட்சி தொண்டர்களும் மாறி மாறி கொல்வது தொடர் கதையாகி வருகிறது. இரு கட்சி தொண்டர்களின் அரசியல் மோதல் காரணமாக இதுவரை 15 பேர் கொல்லப்பட்டுள்ளனர்.
பா.ஜ., சார்பில் 8 பேரும், திரிணாமுல் சார்பில் 7 பேரும் கொல்லப்பட்டுள்ளனர். இந்நிலையில் மேற்குவங்க அரசை எதிர்த்து 2 நாட்களுக்கு முன் 12 மணி நேர பந்த்திற்கு பா.ஜ., அழைப்பு விடுத்தது. இதன் தொடர்ச்சியாக இன்று (ஜூன் 12) போராட்ட பேரணி நடத்தியது.




ஆனால் பா.ஜ., பேரணியில் கலந்து கொண்ட தொண்டர்கள் மீது தண்ணீர் பீச்சியும், கண்ணீர் புகை வீசியும் போலீசார் தாக்குதல் நடத்தினர். இதில் ஏராளமானோர் படுகாயம் அடைந்தனர். போலீசாரை கண்டித்து தடுப்புக்களை தள்ளி விட்டு, பா.ஜ.,வினர் தள்ளுமுள்ளில் ஈடுபட்டனர். போலீசார் - பா.ஜ., இடையேயான இந்த மோதலால் கோல்கத்தா நகரம் முழுவதும் பதற்றம் காணப்படுகிறது.




இருக்கட்சிகள் இடையேயான தொடர் மோதலை அடுத்து அனைத்து கட்சி கூட்டத்திற்கு மேற்குவங்க கவர்னர் கேசரிநாத் திரிபாதி அழைப்பு விடுத்துள்ளார். மேற்குவங்கத்தில் ஜனாதிபதி ஆட்சியை அமல்படுத்த கவர்னரிடம் பா.ஜ., கோரிக்கை வைத்துள்ளது.
கூட்டத்திற்கு பா.ஜ., திரிணாமுல் காங்., இடதுசாரிகள், காங்கிரஸ் கட்சிகளுக்கு அழைப்பு அனுப்பப்பட்டுள்ளது. இக்கூட்டத்தில் திரிணாமுல் காங் கலந்து கொள்ளும் என எதிர்பார்க்கப்படுகிறது. இந்த கூட்டத்திற்கு பின் கவர்னர் முக்கிய முடிவு எடுப்பார் எனவும் எதிர்பார்க்கப்படுகிறது.

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X