காவிரி - கோதாவரி இணைப்பு திட்டம் நிறைவேறும்!| Dinamalar

காவிரி - கோதாவரி இணைப்பு திட்டம் நிறைவேறும்!

Added : ஆக 13, 2019

மேட்டூர் : ''காவிரி - கோதாவரி இணைப்பு திட்டம், நிச்சயம் நிறைவேறும்,'' என, தமிழக முதல்வர், இ.பி.எஸ்., பேசினார்.

மேட்டூர் அணையின் மொத்த நீர்மட்டம், 120 அடி. நீர் கொள்ளளவு, 93.47 டி.எம்.சி., ஆகும். கர்நாடகா அணைகளில் திறக்கப்பட்ட நீர், தொடர்ச்சியாக வந்ததால், மேட்டூர் அணை நீர்மட்டம், நேற்று, 101 அடியாக உயர்ந்தது.ஏழுமலையான்காலை, 9:50 மணிக்கு, அணையிலிருந்து, டெல்டா பாசனத்துக்கு, காவிரியாற்றில் வினாடிக்கு, 10 ஆயிரம் கன அடி; கிழக்கு, மேற்கு கால்வாயில், 1,000 கன அடி நீரை, முதல்வர், இ.பி.எஸ்., திறந்து வைத்தார். தண்ணீர், எட்டு கண் மதகு வழியாக வெளியேறியது.பின், முதல்வர், இ.பி.எஸ்., பேசியதாவது:மேட்டூர் அணை நிரம்ப வேண்டி, திருப்பதி ஏழுமலையானிடம் வேண்டுதல் வைத்தேன்.

அவரது அருளாசியால், மேட்டூர் அணை நீர்மட்டம் அதிகரித்து, தற்போது பாசனத்துக்கு நீர் திறக்கப்பட்டுள்ளது.டெல்டாவில், 16.06 லட்சம் ஏக்கர் சாகுபடிக்கு, 339 டி.எம்.சி., நீர் தேவை. மேட்டூர் அணையில்இருந்து, 220 டி.எம்.சி., நீர் மற்றும் வட கிழக்கு பருவமழை மூலம் எதிர்பார்க்கப்படும், 119 டி.எம்.சி., நீர் மூலம், பாசன தேவை பூர்த்தி செய்யப்படும்.காவிரி - கோதாவரி இணைப்பு திட்டம், நிச்சயம் நிறைவேற்றப்படும். அதற்கான பணி தொடங்கப்பட்டுள்ளது. கரூர் அருகே, காவிரியாற்றில், கோதாவரி நீர் வந்தடையும். அதற்கு கீழ் பகுதியில், கால்வாய் மூலமும், மேல் பகுதியில், நீரேற்று திட்டம் மூலமும், தண்ணீர் பாசனத்துக்கு திறக்கப்படும்.5 தடுப்பணைகள்காவிரி கரையோரம், சுற்றுப்பகுதியிலுள்ள பிற நிலங்கள், பாசன வசதி பெறும்படி, 25 ஆயிரம் கோடி ரூபாய் செலவில், நீரேற்று திட்டம் நிறைவேற்ற, அரசு நடவடிக்கை எடுத்துள்ளது.

தமிழகத்தில், பொதுப்பணித்துறை, உள்ளாட்சி கட்டுப்பாட்டிலுள்ள, 39 ஆயிரம் ஏரி, குளங்கள் துார்வாரப்படும். நீரை சேமிக்க, காவிரி குறுக்கே, மேலும், ஐந்து தடுப்பணை கட்டப்படும்.கால்வாய் மண் கரைகளை, கான்கீரிட் கரைகளாக அமைப்பதால், 20 சதவீத நீரை சேமிக்க முடியும். மத்திய அரசு அனுமதி பெற்று, டெல்டா மாவட்டங்களிலுள்ள கால்வாய்கள், கான்கீரிட் கரைகளாக மாற்றப்படும்.இவ்வாறு, அவர் பேசினர்.நிகழ்ச்சியில், அமைச்சர்கள், செங்கோட்டையன், அன்பழகன், சரோஜா, கருப்பண்ணன், விஜயபாஸ்கர், ராஜ்யசபா, எம்.பி., சந்திரசேகரன், மேட்டூர், எம்.எல்.ஏ., செம்மலை மற்றும் அரசு துறை அதிகாரிகள் பங்கேற்றனர்.

'சிதம்பரம், பூமிக்கு பாரம்'மேட்டூர் அணையில் நீர் திறந்த பின், முதல்வர், இ.பி.எஸ்., நிருபர்களுக்கு அளித்த பேட்டி:டெல்டா மாவட்டங்களில், கடைமடை பகுதிக்கு, தண்ணீர் சென்றடையும்படி, கால்வாய்களை துார்வார, அரசு, 66 கோடி ரூபாய் ஒதுக்கியுள்ளது.'நீலகிரி மாவட்டத்தில், மழை சேதங்களை பார்வையிட, அமைச்சர்கள் செல்லவில்லை' என, தி.மு.க., தலைவர், ஸ்டாலின் பொய் தகவல் கூறுகிறார். கனமழை பெய்த மறுநாளே, அமைச்சர், உதயகுமார், நீலகிரிக்கு சென்று, மழை சேதங்களை பார்வையிட்டு, மீட்பு நடவடிக்கையை துரிதப்படுத்தினார்.

தமிழக துணை முதல்வரும், நீலகிரியில், வெள்ளம் பாதித்த பகுதிகளை பார்வையிடுகிறார். இதுதொடர்பாக, சென்னையில் ஆய்வு கூட்டம் நடத்தி, அடுத்த கட்ட நடவடிக்கை எடுக்கப்படும். சிதம்பரம், மத்திய அமைச்சராக இருந்தபோது, தமிழகத்திற்கு, எந்த திட்டத்தையும் கொண்டு வரவில்லை. அவர் இருப்பதே, பூமிக்கு பாரம் என்று தான் சொல்ல வேண்டும்.இவ்வாறு, அவர் தெரிவித்தார்.

Advertisement


We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X